𠊎等同病毒个距離
【文／徐佳妤／臺北市國小客語支援教師】
發音人：徐佳妤（南四縣腔）
圖一：在花博拿著疫苗接種紀錄卡
哪會知有一日，病毒離𠊎等，恁近……
二零一九年十二月，新冠肺炎對武漢爆發開始，頭下碼臺灣个防疫做了蓋好，總感覺著病毒離𠊎等還好遠呢，無想著，正短短一年零，病毒遰到社區，老百姓都緊張起來，政府共快向外國買疫苗、同時加速國產疫苗个人體試驗；酒精、蒙嘴仔、血氧機、各種防疫个產品，賣到強強滾，賣場、藥房都赴毋掣補貨。
對今年五月中起勢，全臺入到三級警戒，學校停課、做毋得在餐廳食飯、出外定著愛掛等蒙嘴仔、去任何地方都愛實名制、菜市仔有人數个管制，原旦係蓋平常个日常生活，一𥍉目都變到無共樣咧，係講著病个人數無降下來，愛歸轉弄擺个日仔都變成妄想。
因為疫苗毋罅，𠊎毋識去上網預約，除了醫護人員，還有人比𠊎還過需要，尤其係每日都愛面對人客个員工：像店員、送貨人員、運轉手、飯店餐廳人員……一直到學校愛造冊時，心肝肚想：輪到學校个先生注射哩！打白講，受著負面新聞報導个影響，多多少少有息把仔驚驚，毋過，又想著學生仔還無法度注射，先生定著愛先注，保護自家也保護學生仔，就毋使愐恁多咧。
圖二：花哩咇哱个防疫產品
前駁仔，有一家產險公司个疫苗險賣到了錢，因為無想著，疫情會恁嚴重。注射前一日，自家乜上網保險，正幾百銀个保費定定，做得分自家同屋下人安心。七月二十二號，輪到吾學校去圓山花博園區注射，注下去該量時，自家同病毒个距離蓋像又遠、又近咧……
