老伙房
【文／黃美貞／光復國小教師】
發音人：黃美貞（四縣腔）
在伙房大个細人仔，盡記得个就係伙房个人情味，無論係緊工時節个交工，還係過年過節个祭祖，大家總係會互相𢯭手，就像一個大家庭樣仔，總有講毋煞个笑科同故事，愐著就異生趣。
六月天公，早季个禾仔割起來，盡要緊係愛拚好天晒穀，天時係好，五日就過榨；係堵著風馳雨，就愛同天公搶時間，穀斯涿雨毋得，一旦食著水氣又無燥水，萬一暴芽就壞蹄哩！故所，拚大雨前，自家个穀堆收好，遮好篷仔，毋使人喊，自然會擎等蕩仔走去隔壁鄰舍，該時阿姆正經輒常驚到歸身大汗。看等天頂緊擎雲楯，一陣烏天暗地，雨強強嫲會跌下來哩，三個大人好使壩仔，其他个細人仔祛把緊掃就著了，心肝想个就係，愛遽遽將穀收好，就像老古人講个：「人多好做事，水大好行船！」實在分人當感動！
過節打粄仔䌈粽仔，係婦人家一等要緊个頭路。上屋个大叔婆係盡遽手个，吂曾吂焿粽粽葉、鹹粽个枸薑葉就割便、洗好，大家正想著愛來糴米、買蝦米，厥孫仔就擎等粽仔過家尞了。有一年，阿姆無包焿粽，𠊎同老弟去尋阿明頭搞，搞到半下晝，肚屎枵了，阿明頭就走轉屋下，弄弄仔擐等焿粽出來，𠊎同老弟也無細義，粽葉解開，軟軟涼涼个焿粽，搵幼糖食，一粒食忒又一粒，阿明頭在脣項緊說厥婆，𠊎同老弟就緊食緊頷頭。結果，該暗晡，阿姆同𠊎講，細人仔係過兜豬，連叔婆愛留來敬神个額數，就分𠊎兜囫淨淨，實在還敗勢。
這擺新冠肺炎个疫情，十分嚴重，尤其在苗栗地區，後來遰著病个人數斯嶄然多。阿爸就先請示大輩个叔公，五月節个祭祖愛改變方式，做毋得群聚，往年係五月節朝晨，大家共下轉來敬阿公婆，這擺，愛展前來祭拜。先用電話、line一房一房來通知，毋好堆堆个人尖共下，五月節年年就有，盡要緊个係子孫平安，阿爸講：「食到老就愛學著老，食著八十零歲，想法愛跈得上時代，尤其係生命健康，斯一息就馬虎毋得！」
現下个伙房淨伸著老人家歇定定，罕得看著細人仔，乜聽毋著細人仔个聲，逐擺看著大廳下个禾埕，就會想著頭擺大嫲群个山猴仔，透當晝搞到噦喤殺天，歸伙房走相逐个生趣事，一𥍉目，三十零年就過忒哩！山猴仔乜走淨淨哩！
