桂花巷
【文、圖／邱一帆／國立中央大學客家語文暨社會科學學系客家研究博士班】
發音人：邱一帆（四縣腔）
傳統个雞寮
同豬屎个味道
既經消失十過年
十過年前
共下攎手捋腳
拚出个淨俐
種出个靚
還有無議無論个付出
在這位
行入桂花巷
你鼻得著
淡淡个桂花香
行入桂花巷
你看得著
靚靚个細花園
行入桂花巷
你感受著
純純个人情味
十過年來
緊開緊多个店面
緊來緊多个人客
你敢還有影著
該一搭一搭个細花園
開容笑面
你敢還有鼻著
該一盆一盆个桂花樹
滿路飄香
你敢還有感受著
該一擺一擺个坐談會
帶來个燒暖同希望
