從艮字到很字
【文／范文芳／國立清華大學中國語文學系退休教授】
發音人：范文芳（海陸腔）
一 、先從字形結構講起
1. 艮字在甲骨文時代，係會意字，上頭原係目字，下頭係人字，原意係講一隻人，回首怒視。
2. 說文解字解說為比高低不相上下，字義無錯，只係將下半人形，解做比較个比。
3. 後來將艮个左片，加上目字，就係現今常用字【眼】，客語慣習用目珠。
4. 傳統漢字辭書，艮多做為表音个聲符，像很、狠、恨、跟、根、痕、限。
5. 退字係會意字，艮表後意，辵表行走，艮表意不表音，腿字從肉退聲。
6. 很字從彳艮會意，艮兼表音。
二、隨後來講字意个演變
1. 艮借為八卦卦名，象徵丘嶺、山徑，五行為土，五音為宮，假借个定義，係指借其字形、字音，無愛其本意。
2. 很字同狠同音，兇狠个本意還保留。
3.很字借為程度副詞，在現代漢語係常用字，像很大、很高、很快樂。
4. 中國元朝時，出現異體字【哏】，字意摎很、狠相近，現代台灣流行新華語辭彙【哏】，意指滑稽、有趣、可笑之話題。
三、有關字音个討論
1. 廣韻艮字，音古恨切，韻尾收｛n｝。
2. 現下常用客語，恁久好麼？恁字從任得聲，其實不管任、心全係｛m｝收尾，可見恁字个客語發音應該係｛m｝收尾。
3. 客語常用語｛an｝，用恁係毋適當个，主要原因係韻尾毋著。
4. 用做副詞个｛an｝，用很係比較正確，客語常用很大、很高、很好食，全係很。
5. 因為很字用做副詞，基本上係虛詞，其字音就有可能隨著語境變動，聲調會變化，今下个新竹客語，很字个語音，變化盡多，有｛an42｝多，｛an24｝慶，an55 多兒do42er55，｛an11｝工夫。
四、台灣客語可用漢字書寫，毋過其習慣用詞，約定个句型，還係愛保持其特殊風格，苗屏腔客語很音｛an42｝，比較穩定，新竹腔就比較多變。
