大路關觀音壇
【文、圖／鍾榮富／南臺科技大學應用英語系講座教授】
發音人：鍾榮富（四縣腔）
新大路關个觀音壇成立到今超過六十年，在這出生个細人仔，每一个都來這求過平安絭，希望生長平順，學業有成。可以講，觀音壇係大陸關人記憶个一部份。
大路關本來淨一个庄頭，後來水打莊（1857年，咸豐7年），河壩水對莊腰一沖，將原來个大路關，沖作兩個庄頭。北片个，安到舊大路關。南片這庄，近山多林，安到「坪頂」，又喊到「新大路關」，後來官方正名為廣興村。依照客人風俗，新建庄頭，愛先尋大樹仔，在樹下立伯公。堵好坪頂北片有一頭老榕樹，先民就在樹下頓一粒大石頭，也毋識刻字，大家就恁仔開始拜起來。
根據日本時代个土地登記，廣興村本來有三個功德會：福德會、恩公會（恩公廟）、媽祖婆。福德會在1934年（昭和九年），將頭擺个石頭伯公改建，用了大碑石來代替石頭，刻下「福德正神香座位」，就係今下个伯公。
後來村民開大會，決定將媽祖婆同福德會合起來，組織鸞生，同時決議在伯公頭前个廣場右側簷興建「廣興壇」，奉祀媽祖婆。村民心目中的媽祖婆就係觀世音，故所「廣興壇」又喊到「觀音壇」。大路關先民來源不同，但係大部分對梅縣東北个嵩山堡搬來个，到今還保存了嵩山堡當地个客話特色，讓大路關个客話同其他地區个腔頭大不相同。有「媽祖婆」个名仔，可能早期先民帶有海陸个色彩，毋過，靠山个祖先拜觀音多過媽祖，故所後來採用觀音壇个名稱。
「廣興壇」興建之初，就像如今个面貌，一个主廳，兩片廂房。主廳內有三廊，分別奉祀觀世音、王爺（客家人口中个王爺，就係三山國王），伯公。觀音壇成立初期，由鸞生輪流負責清掃、上香、奉茶等工作，還愛約有閒个鸞生上山採藥，歸來晒燥。後來觀音作法，捉上槓个阿硬叔做童乩。只要村民有麻个毋平安，這痛該痛，就請阿硬叔開壇問神。講來還係奇怪，就恁仔大路關人度過一切困難，行過各種災難，大家平平安安過日仔。
阿硬叔過身以後，觀音捉無童乩，壇上也毋再同人開藥方了。但係，有个無个故事還係足蠻多。輒常有外地人，歸家老嫩大細來到觀音壇點香唱諾，感激佢送藥方去到門口，醫好佢等个老人家。
