畜鴨子
【文／黃美貞／台北市光復國小教師】
發音人：黃美貞（四縣腔）
現下个人愛食麼个就當利便，去市場買，切好好、剁便便、燒熝熝仔打開來就做得現食，毋比得頭擺人愛自家畜頭牲，過年過節、蒔田割禾，正盼得㓾雞捋鴨來敬神拜伯公。
阿姆長透講：「鴨仔難畜又壞㓾，毋過鴨肉實在好食。」故所，一年總愛捉兩枋鴨子來畜。鴨販仔有一本記事簿，哪家屋哪日捉幾多隻鴨仔，佢會詳細登記，等到時間到了，就會載等大嫲籠个鴨子來屋下，該下，就係𠊎摎老弟盡暢个時節。大籠仔一打開來，淰淰个細鴨子，圓圓个目珠，黃黃个幼毛，看起來有一息仔緊張，細鴨仔蹄踩踩踏踏，不時還會唧唧啐啐。
阿姆擇鴨子有要領，第一愛雄頭，雄頭就係有精神雄騯騯，毋會殗殗。第二毛个色水愛金頭 ，毛色靚代表健康，另擺正會好畜。第三愛看鴨屎朏，屎朏係溼溼可能係屙痢肚，愛費大精神來看顧，愛擇屎朏燥燥个較妥當。第四愛擇較大骼个，大骼个鴨仔第定著較粗骨，較打粗，吸收好，自然畜仔到較大，一枋愛捉有兩十隻仔正罅用。
正捉个鴨子愛先用紙箱仔畜，底下鋪一層舊報紙，面項掞兜仔礱糠析，放一隻飼料篼仔同水篼仔，面頂高定著愛牽一杷大約三十燭邊个電珠仔，再過用一垤布仔掩起來，恁仰鴨竇正會燒暖，𠊎盡喜歡偷偷仔去掀布仔，看鴨仔在該無閒麼个？結果，細鴨仔乜會用圓㪐㪐个目珠看等𠊎，黃霞黃霞个光晟啊去，看起來當得人惜，輒常偷偷仔伸一隻手去摸厥个毛，下擺仔還會偷偷仔用兩隻手巴掌托等，一下仔又遽遽放轉去。
有一擺，𠊎摎老弟聽人講，鴨仔愛泅水正會大，就䀯等阿姆無閒該下，擇一隻較大隻个，去外背个圳溝窟學泅水，一放啊下，鴨蹄就在水肚躪幾下仔，黏時就會泅水哩！鴨仔泅水當自然，毋使出力樣仔，𠊎看到目金金仔，老弟乜看到呆呆，就參詳輪流帶鴨子出來，正準備帶第二隻出來該下，阿姆堵好在後尾門轉來，看著𠊎兩儕偷偷撂撂，開聲咄啊來：「你兩儕在該搞鴨子係無？」又看著第一隻鴨子，跔在箱仔壁角緊顫，正遽遽拿舊面帕捽毛，吹風機吹燒風，差一息仔就會無命哩！
在莊下大个細人仔，雖然無麼个玩具好搞，無麼个零嗒好食，毋過有盡多个動物伴仔共下尞，共下大，乜在肚項學盡多个學問，該兜係用錢就買毋著个人生經驗。
