仙女落入凡間
【文／薛常威／國立中央大學客家語文暨社會科學學系在職專班碩士生】
民間故事或民間信仰裡，神仙一直是個很特別的存在，祂們滿足了凡人對於美好人生的想像，長生不老，榮華富貴。但是神仙（仙女世珍）也有七情六慾，會動凡心，會被懲罰落入凡間，這時祂們通常會被賦予一些任務，特別是要照顧那些身處困頓，卻不忘勤讀書、盡孝道的人（崔文瑞）。這些故事也安慰了廣大的平凡人，只要我們可以守本分、讀聖賢書、孝順父母，我們還是會有好報的，甚至神明都會下凡來幫助我們。
世珍：自從𠊎下凡以來，行來行去，盡自然。𠊎个任務斯係這一百天摎崔文瑞結夫妻。天恁大，毋知愛去哪位尋人，愛如何是好呢？遠遠看一隻人影過來，毋知麼儕，問佢崔文瑞何在就可以？
文瑞：這位小姐，𠊎窮苦人，愛做生理，不好耽誤𠊎。行這片妳就行這片，閃妳行別條路，妳又擋過來。小姐，為了何因？
世珍：係𠊎來問你喔，你看這街路項，人恁多，細倈人毋讓人過，𠊎知了，你一個書生，調戲女人。
文瑞：小姐啊，哪有可能，𠊎係一個窮苦人个書生，哪有可能愛食妳个豆腐，𠊎係正經个君子。
世珍：你係君子？該𠊎問你，既然你係君子，安到麼个名字？
文瑞：名喚崔文瑞。
世珍：啊，崔文瑞！頭下正唸等，這下嗄分𠊎堵著，好運啊。喔〜你就係崔文瑞啊。你係崔文瑞个話，該𠊎斯相信你。你崔文瑞，風聲盡好，崔文瑞係一個孝子。
文瑞：奇怪，𠊎摎妳素不相識，妳仰會講麼个𠊎當出名，毋知，妳麼个意思啊。
世珍：你毋知啊，其實你毋識𠊎，毋過發生麼个事情，𠊎全部曉得，像你爸以前係做官人，死忒去，你母子兩人正會轉來故鄉寫聯對，賣著有錢分你个娘親。著無？
文瑞：唉呦，你算命个啊？恁慶，恁會算。
世珍：毋係，孝子感動天。孝子，大家就會一儕傳一儕，百過儕，千過儕，大家乜知。
文瑞：好，這…已經講好了。小姐，換𠊎問妳喔？請問，妳个芳名？
世珍：𠊎係…你毋識𠊎，𠊎戴當遠當遠个地方，𠊎雙親當早就來死，伸𠊎一儕人。所以，𠊎愛來這地方，看有麼个好尞，堵堵好堵著你。
文瑞：張小姐啊，妳講妳愛尞，𠊎又無錢，𠊎又毋識出去尞，該𠊎毋曉得，愛報妳去哪尞。
世珍：𠊎也無講愛你渡𠊎去哪位尞，𠊎斯想講，既然恩兩儕人有緣，𠊎有一句話想愛對你講。
文瑞：妳講麼个啊？愛講麼个，就講啊。
世珍：講，無要緊喔，你毋好敗勢喔。
文瑞：𠊎毋會摎妳敗勢啦。
世珍：係無？該恁樣形个話。崔公子，你愛𠊎講，𠊎斯講分你聽，你愛詳細聽分佢清楚。
文瑞：毋係，小姐啊，講話就講話，妳恁樣形緊凴過來，妳敢毋知，男女授受不親啊。
世珍：對別儕人係男女授受不親，你頭下講你係君子，所以你毋會對𠊎仰般形。尤其，係這孝子分𠊎感動，𠊎緊來緊愛你，𠊎也無親無戚。
文瑞：蛤？愛𠊎。
世珍：係。
文瑞：喔，妳…繼續講。
世珍：𠊎又無爺無哀，𠊎想愛尋一個人，堵著崔文瑞，你看𠊎你有中意無？𠊎想愛嫁分你做餔娘。
文瑞：妳等一下。
文瑞：呦，仰會有人細妹人恁大面神，開嘴斯講麼个愛嫁分𠊎做餔娘。恁大方啊，頭腦無麼个正常。毋知哪位來个阿戇妹仔，會分佢驚死。
文瑞：𠊎摎妳講，張小姐，妳講妳愛嫁分𠊎喔？
世珍：係啊。
文瑞：該，𠊎當苦喔，𠊎屋下斯無錢个人喔。
世珍：無要緊，𠊎無嫌你苦啊。
文瑞：係無？但是終生大事，要分𠊎个娘親先知，妳愛分𠊎姆認定，正做得做佢个心臼。
世珍：該理所當然，𠊎跈你轉來去。
文瑞：正經愛跈𠊎轉？正經个？
文瑞：做麼个？
世珍：摎𠊎牽啊，你愛牽𠊎，𠊎正知路好轉啊。
文瑞：愛摎妳牽喔？該妳下二擺會聽老公个話無？
世珍：𠊎盡聽話，盡賢慧。
文瑞：該妳會洗衫，會做生事無？
世珍：當然樣樣步步，𠊎乜曉得。
文瑞：愛牽手，愛聽老公个話，妳講的喔。該這分妳拿，𠊎渡妳來去。
1.聯對lien11dui55：華語對聯的倒裝。
2.伸cun24：剩下、多餘。
3.敗勢pai11se55：不好意思、對不起、過意不去。
4.凴ben55：靠在某件東西上。
5.大面神tai55mien55siin11：比喻人臉皮厚，無羞恥之心。
6.阿戇ngong55妹仔：傻女孩的意思。
7.屋下vug2ha24：家裡。
8.下二擺ha55ngi55bai31：下一次。
9.樣樣步步iong55iong55pu55pu55：每樣事務。
