同祖先尋一隻安心歇个位所
【文、圖／彭欽清／國立政治大學退休教授】
發音人：彭欽清（四縣腔）
又到誒掛紙个時節，大體這下人百年後，毋係放在祖塔就係放在公家抑私人起个塔項，較集中，愛掛掃加盡利便。
還細該下跈大人去掛紙，愛兩日。正月十六去大湖八寮灣个塚埔掛吾公，吾伯愛對銅鑼八燕坑來掛，掛好轉吾屋下食飽晝正轉。第二日，大家又正去八燕坑掛上輩个，有兩門。
大湖義民廟附設納骨塔中間最高棟樓
去當當愛蹶崎，大體又係石碫仔路，行過峎還愛溜一大截崎正到張屋人田崁頂該穴，係吾太个，碑石淨一大垤紅磚仔，無鏨字。掛好正去吾姑屋脣个吾太厥爺娘、吾婆太、過吾姑婆个（大人講係細細仔喪忒个，碑石項鏨彭姑娘）。掛好就會晝誒，在吾姑屋下食飽正轉。吾伯公無倈仔，招一个婿郎，降兩個倈仔，頂兩姓；吾伯過房分佢，佢這兜食飽晝還愛去掛厥屋脣个吾伯公過伯婆。
民國四十三、四年仔，吾爸過吾伯在八寮灣个塚埔同吾公牽䟘起來，先放在八燕坑大穴个脣項寄岩仔。
吾爸識多少仔地理，民國五十七年在柑仔樹下吾伯个山林項尋著一個異靚个地，面對後龍溪，後凴大湖銅鑼合界个山，兩片有凴手，做得做上下兩門，上穴放公太到吾公這桍，下穴放吾伯公這桍，請地理先生合過羅盤、一挷好線就開工。
該下仔還吂有產業道路，又愛過人个林，紅毛泥這兜建材愛硬㧡到到，好得有山泉水好用，起歸半年仔正起好。請地理先生擇好日仔，將三穴个金斗盎擐起來，進金到新起个兩門風水，歸下仔張好勢，又正擇隻日仔圓墳。圓墳該日當鬧熱，親戚朋友，隔壁鄰舍相賽送金花炮燭來，該暗晡請人客。
民國七十年邊仔，對大湖芎蕉坑翻過峎到柑仔樹下个產業道路開通，掛紙就加已利便，毋使半點鐘車仔就駛得到，行一截仔竳崎就到風水誒。
吾伯公个孫仔這房个後撐仔，毋係搬到後山就係去大都市，伸吾伯這家來掛。尾項，吾伯一屋下人又搬去三叉，山仔無人耕，塞芃芃仔又生當多雜樹，逐年掛紙頭一日愛先去伐菅草這兜。三叉過來路較遠又較細條，就憑筊仔，將吾伯公、伯婆，過厥孫仔个骨骸徙去三叉。
民國一百零一年熱天，柑仔樹下行大山，離風水差毋多兩三百公尺仔定定。第二年掛紙愛捩到銅鑼个老雞隆過黃蔴園，路細條又彎斡，使車仔愛點過兩點鐘，大家參詳過後，憑過筊仔，同骨骸起起來化過，放到大湖義民廟脣个納骨塔。
這座塔係吾爸做第一屆義民廟主任委員該下起个，佢先用自家个屋仔去抵押，來同農會借錢，再過請大眾題錢，頭尾起忒會兩年。
愛圓塔个頭日，吾爸請人同地藏王菩薩開光點眼，愛放入金身肚項个牛羅蜂捉來交分香公仔。該暗晡，佢洗好身腳，旋旋風嗄失魂，跈等就轉家。大家感念著吾爸个功德，決定將納骨塔頭排中央个位仔分佢。
銅鑼柑仔樹下祖墳掛紙
該年𠊎當當在加州寫碩士論文，吾姆吩咐屋下人毋好分𠊎知。佢講吾爸早就知佢無福氣再過看著厥滿子誒，流年批等講“親生五子四送壽。”等好事辦忒，吾哥到厥間項个拖箱仔肚揙出厥流年，確確係恁仔造个。
吾來臺祖歇竹東，兩代過後吾這桍徙到八燕坑，有兩代个風水尋無，好得阿公婆牌頂項刻有名仔，一百零二年該下就順續仔做加兩罐共下進塔，總算同祖先尋一隻做得安心歇个位所，也盡誒做人子孫个義務。
