好木再生緣

【文、圖∕薛常威∕國立中央大學客家語文暨社會科學學系在職專班碩士生】

 

　　以前，當多日常用著个東西，像屋下个桌仔，凳仔，眠床大體係愛人工來做，所以斯有當多無共樣个手藝好，功夫好个師傅，像木匠，鐵匠、泥水師傅這兜。毋過，這幾年因為工廠做得大量生產，毋使恁多人工，當多老師傅嘎一下無頭路。像家具這下全部用機器生產，做家具个木匠師傅這下嘎無事好做。


　　湖口老街有一間「好木再生緣」，店頭家陳大哥本底係電視台做了三十零年个攝影記者，佢本成斯當好收集樹頭，還過漂流木，乜長透去庄下个老屋拈兜壞忒、舊忒个凳桌轉來。佢講像該壞忒一半个桌仔，其實還有另一半還當好用，尤其係該老屋屋頂个大樑，當砸，一兩百年毋會壞。

　　退休以後，佢斯在湖口老街開了這間「好木再生緣」。專門賣用這種分人擲忒，毋過還當好个木頭重新設計過个家具。像凳桌、眠床、桌燈，當多種。

　　雖然陳大哥毋係木匠，毋過佢當好畫圖，係有人客想愛訂做桌仔，凳仔，無使其它个家具，佢會自家畫圖，了後請湖口本庄个四個老木匠師傅來做。佢笑講，佢自家斯七十零歲了，該兜老師傅還較老，八九十歲有，毋知還有幾多年好做，所以佢摎該幾個老師傅講，佢這訂單無限定工期，係有閒斯加減做，定定做，做好正拿轉來店肚，陳大哥毋會拖欠師傅工錢。像這兜恁古老个樹頭，壞忒个家具，一定愛當有經驗个老師傅正奈得何。所以這間「好木再生緣」毋單淨有舊東西再過回收利用个環保觀念，同時乜分這老一輩个師傅，感覺着自家還當有價值，還做得用自家个手藝來賺錢。

　　下二擺，去湖口老街，除忒逛尞三元宮、天主堂。記得來這間「好木再生緣」行行看看下，無定著你會看中意一件家具，係一個老師傅用百過年个樹頭重新做成个藝術品。

薛常威先生 聲檔 —　好木再生緣（四縣腔）

▲BACK