細老鼠發夢，夢著老鼠妹

【文圖／張捷明／國立中央大學客家語文暨社會科學學系在職專班碩士】

 

　　朝晨六點，鬧鐘響到乒~砰滾。讀油桐花森林小學三年生个細老鼠當臨好睡，鬧鐘撳忒，想目瞇瞇仔韌加一下床，瞇瞇痴痴又睡忒矣。一直到老鼠阿姆喊講：「日頭曬屎朏咧，還毋䟘床！」細老鼠一下著驚，跋啊䟘起，臥起頭看時鐘仔：「壞忒咧，既經七點半矣，會赴毋著矣啦！阿姆！汝仰毋早个喊𠊎呢？今晡日愛考數學，吾數學宿題還吂做好呢！」

　　細老鼠仔抹籮抹掣，走去書房尋書包仔，又走入間上尋衫褲、尋鞋襪，還腳緊蹬，老鼠阿姆講：「𠊎看汝昨暗晡讀書讀到轉點，恁辛苦，故所朝晨想分汝睡加一下仔，𠊎奈知汝功課吂準備好！下二擺愛量早準備，正毋會臨時臨急，知無？」細老鼠講：「𠊎知矣啦，下二擺毋敢矣啦！」

　　佢頭顱傾下來繫鞋帶仔，心肝肚想：「希望這係發夢个，係無，這擺慘咧！係分隔壁班个老鼠妹知著，一定會毋搭𠊎矣啦！」佢愛保持完美个形象逐老鼠妹，老鼠妹係油桐花森林小學盡得人惜个細妹仔，大家就講佢兩儕盡登對。

　　細老鼠搨好鞋帶，跋啊䟘起就走往出！厥姆適後背喊講：「汝還吂食朝呢！」細老鼠仔走到像飛，直直拚去車頭，奈有聽著厥姆適該喊。

　　佢一隻手拉車門，一隻手伸入書包仔拿車票，前腳擎起來上車，佢正發現無帶著書包仔…

　　老鼠仔今晡日怕係行著衰運，『屋漏偏逢連夜雨，行船又遇對頭風』，這擺正經係『食著生芋荷~抓頦』矣哪！細老鼠仔一下著驚，嚇到一身大汗，面賸無兩指大，就醒過來矣。

　　佢手緊搭心肝緊想：「該哉正得！該哉正得！該哉係發夢得似」。

　　佢拿出手帕捽額頭个冷汗，同時間耳公頭又好恬恬聽著山羊先生發譴个聲；山羊先生戴等一付老花目鏡，頭顱頂个羊角尺零長，留等一撮長長个羊鬚，上課盡嚴條盡惡，惡過老虎，係油桐花森林小學肚盡惡个先生，同學片背罵皇帝，喊佢『老虎愁』。這時節細老鼠仔既經嚇到精神過來矣，心肝怦怦飆想：「這~擺壞蹄咧，皮無先弓較緪兜仔做毋得」。

　　山羊先生咄講：「細老鼠！䟘起來！考試竟然還敢啄目睡，罰汝去門口企！」

　　細老鼠頭攋攋仔行等出去，心肝肚當懊惱个想：「『一個拉尿个換一個拉屎个』，醒過來比發夢還較慘！下二擺一定愛當日事當日煞，毋敢留到愛考試前一暗晡，正來蘁夜拚夜事，搣到連考試都還會啄目睡，還睡到發夢，逐還發恁得人驚个夢。門口罰企恁見笑！菩薩愛保庇喔，毋好分隔壁班个老鼠妹看著！係無，見笑無打緊，下二擺就無機會逐佢矣！」。毋過，無驚無恁死，越驚越死，老鼠妹堵堵就從巷路行等過來…，細老鼠仔一看，驚到會死，心肝想：「這擺古董矣哪！希望這擺還係發夢个……」。

　　佢目珠眨等，毋敢擘開來……，耳公淨聽著厥姆喊講：「日頭曬屎朏咧，還毋䟘床！」。細老鼠一下著驚，跋啊䟘起臥起頭看時鐘仔：「壞忒矣啦，既經七點半咧，會赴毋著矣啦！阿姆！汝仰毋早該喊𠊎呢？今晡日愛考數學，吾數學宿題還吂做好呢！」細老鼠仔抹籮抹掣，走去書房尋書包仔，又走入間上尋衫褲、尋鞋襪，還腳緊蹬…

　　細老鼠好恬恬企正來，心肝頭怩忸一下想：「仰頭下个情景，摎進前个頭隻夢共樣~共樣呢？該𠊎這下到底係發夢也真實醒過來？係照恁樣下去，該毋就又愛毋記得書包仔，又愛罰企分老鼠阿妹看加一擺古董？𠊎正做毋著一到，竟然還愛連連續續責罰恁多擺，𠊎無愛！𠊎無愛發夢矣啦！阿姆！」

　　細老鼠仔緊噭緊喊講：「阿姆！𠊎知差矣啦！阿姆！阿姆！喊𠊎醒過來好無……」。

張捷明先生 聲檔 —　細老鼠發夢，夢著老鼠妹（四縣腔）

▲BACK