「澗仔壢」地名源自平埔族話

【文、圖∕徐貴榮∕國立中央大學客家語文暨社會科學學系兼任助理教授】

 

　　「中壢」頭擺安到「澗仔壢」。一直以來，人就講「早先客人來到這中壢台地項開發，在老街溪、新街溪這兩條河壩个中央起屋，形成街路。這兩條河壩南北平行穿過，又因爭客話將河壩凹塌个地方安到『壢』，故所安名『澗仔壢』。」

　　客話將河壩凹塌个地方安到『壢』毋會差，問題係客話從來毋識同「河壩」安到「澗仔」啊！這就有一息子疑狐吔！一直到十過年前，看着毋知麼人畫个「康熙台灣輿圖」正知「澗仔壢」地名係源自平埔族話來个。根據這張地圖个說明，係用中國山水技法畫个，色彩精美，筆工幼秀，內容係用寫實个手法。根據專家个考究，大約係康熙31（1692）年到43（1704）年之間个情景，也就係畫出18、19世紀交接个時節，台灣西部由北到南个山川地形、兵力部位、城鄉生活景觀，做得講係台灣當年社會文化个縮影。（圖1）

　　由這張圖項，當時桃園个六隻平埔社，還吂有看着霄裡社、龜崙嶺社、大坑社，就看着大家當熟个「南崁社」，還有「之巴社」，還過「澗仔力社」三隻社定定。澗仔力社脣項寫「澗子力社至鳳山貳拾里」，西片「肱肱社至澗仔力社肆拾里」，北片「鳳山至之巴里拾里」，可見當年个「澗仔力社」就係這下个「中壢」毋會差。

　　1.安倍明義《臺灣地名沿革》頁125、武陵出版社1996、洪敏麟《臺灣舊地名之沿革》第二冊（上）頁54～55，臺灣省文獻會出版1999三版、黃厚源《人與地學訊》頁39-3～39-4，桃園縣文化局出版2002。

　　當時還吂有漢人來開發，莫講有客人來到這，由圖項也看得出當時个「澗子力社」、「之巴社」到「南崁社」附近仔，鹿仔、羊仔當多，走上逐下，原住民在該㧡擔使牛車、挷箭射鹿羊，哪仔都還係草塞塞、荒野野仔，還吂開發个蠻荒所在。故所這「澗仔力」定著係平埔族名毋會差，並毋係客人來到正安名个，至於仰般發音？到今無法度考究咧！

　　「澗子力」後來仰會變到「澗仔壢」呢？哪久變到「澗仔壢」呢？這乜值得去考究。在雍正時期就有少數漢人來這開發，乾隆以後就慢慢多起來吔！尤其係廣東客人越來越多，包含嘉應州四縣、惠州海陸豐移民，還有福建汀州府永定來个，中壢變到客人个墾地。後來，這兜客家人同地名「力」改到「壢」，將這一搭仔个庄名安到「澗仔壢庄」。從清朝乾隆21～24（1756～1759）年个《乾隆臺灣輿圖》還寫「澗仔力社」，到25（1760）年个「臺灣民番界址圖」就變到「澗仔壢」，南片還有霄裡社、八座屋這兜地名來看（圖3）。可見由「澗子力社」到「澗仔壢庄」，應該係乾隆二十零年前後个事，堵好這時節也係大墾戶郭樽墾號到中壢開墾最輝煌个時期。


　　中壢這兩條河壩無大，也算坑壢啦！故所「澗仔力」分客人改到「澗仔壢」。鬧熱以後，又變到台北到新竹个中間休息站，正改到「中壢」，係後來个事。這下「澗仔力社」就伸着中正路新明市場前、老街溪脣个「舊社」名，恬恬仔囥等頭擺个過去。

徐貴榮教授 聲檔 —「澗仔壢」地名源自平埔族話（四縣腔）

▲BACK