十年河東 十年河西 莫笑窮人著爛衣

【文／何石松】

 

　　十年河東，十年河西，莫笑窮人著爛衣，係講𠊎俚毋好大細目，看毋起該著爛衫爛褲介人，下二擺會仰般還毋知啊！這句諺語，原來係講黃河差毋多逐年都會發大水，湓河湓崁，十年浸河東，盡多人分水打走，無衫好著，分河西人笑。無想著，十年又浸河西，河東河西輪流轉，該正知功夫啊！所以，在人受災難介時節，千萬毋好笑人正好。毋單淨毋好笑人，還愛幫助人。同時也愛趕早做預防工作，無斯災害來時，會手扡扡，無結無煞。

　　因為，世上介事情，就像天頂白雲變化共樣，佢敢一色青天，一下仔也敢天烏地暗，喊頭大水 ，千變萬化。所以孔子毋敢去接隔夜帖，斯驚下擺吂得時介事情，會仰般轉變全毋知，仰可以看人毋起，笑人著爛衣呢？同時，也有鼓勵人愛上進，毋驚今日著爛衣，斯愛肯煞猛打拚，三十年河東，三十年河西，下擺會仰般，該斯正經還吂知﹗

　　聽講漢朝時節有個朱買臣，屋下當苦，著等爛衫爛褲，一片撿樵，一片讀書。厥餔娘無辦法跈佢過恁苦介日仔，就愛摎佢割冊。講佢衣衫襤褸，恁無出息。朱買臣斯講：「𠊎這下四十，等加十年，到𠊎五十歲時就會出頭，有好日仔好過，𠊎一定會報答你。」厥餔娘當閼講：「等到五十歲，𠊎毋枵死正怪。哼！」就跈有錢人走去咧。無想著，後來，朱買臣正經就做著浙江介太守。厥餔娘嗄分有錢人拂忒，流浪街頭。該就係馬前潑水介故事。實在係十年河東，十年河西，無人得知！

　　還有該唐朝時節，大將郭子儀平定安史之亂，功勞當大，皇帝毋單淨招厥倈仔為駙馬，還起一間安到「河東府」介大屋分佢戴，並請河西一個窮苦婦人家來服侍佢兜，過等榮華富貴介生活。無想著，郭子儀介屋下人，看著這婦人著介衫褲，律律不不，爛之爛擐，斯笑佢講：「你仰會恁苦呢？」

　　可惜介係，該兜子女過慣這飯來開嘴，錢來伸手，習慣大開大使，使錢就像水推沙介日子，完全毋知生活介艱難，創業維艱，守成不易介道理，正經係「一代富，咬薑並啜醋；二代富，騎馬坐轎毋行路；三代嗄不識時務。」加上又看毋起窮人著爛衣介錯誤觀念，所以等到厥孫仔時節，嗄摎郭子儀留下來介祖公業了淨淨，過等乞食介生活。佢就想愛去尋該頭過河西請來介乳哀，拜託佢幫忙渡過難關。

　　等佢去到河西時節，尋毋著乳哀，但是，看著乳哀介倈仔，又看著該連峨接棟，金擠𥍉爧介大瓦屋，還有該當闊介田園，大家還在該當煞猛做事，佢斯當奇怪介問，仰般恁有錢，還愛恁煞猛呢？乳哀介倈仔就講：「𠊎姆頭擺在河東著爛衣分人笑，所以，長扯教訓𠊎兜愛勤儉做家，正毋會分人看毋起啊！」郭子儀介孫仔，聽著當敗勢。

　　雖然，河西人對佢已好，想愛摎佢留下來，但是，佢麼介都毋會，自家斯頭犁犁，慢慢行等走咧。乳哀介孫仔看等佢介人影越來越遠，就講：「嗨！三十年河東，笑人著爛衣；四十年河西，嗄無位所好企！」

　　※此處的「介」為大眾通用的「的」，同教育部訂的「个」之意。

何石松 聲檔 — 十年河東 十年河西 莫笑窮人著爛衣（海陸腔）

▲BACK