客家話个統獨

【文／羅肇錦∕國立中央大學客家語文暨社會科學學系榮譽教授】

 

　　推廣客家話，最麻煩个事情係客家話恁多腔，所謂「四海大平安六」，毋知愛用哪一腔个音，哪一腔用个漢字詞彙？因爭大家理想个做法，係同自家完全共樣个盡好，个就愛六腔獨立正做得。毋過各腔獨立係理想定定，一到考試，一到比賽，一到教學該下， 就愛乖乖仔行統一个路線。行統一路線，正有厥个公平性，一致性，教學正毋會無標準。 為了這个標準，大家愛攉忒自家特有个用詞特別个讀音。結果，推廣客家話變成消滅客家話。實在恁難剃頭，冤枉正得。

　　賴仁政先生教山歌，輒常會提醒學生仔，唱山歌愛重視斷氣斷句，毋好愛斷句毋斷氣唱到氣渺渺，抑係愛斷氣毋斷句，意思走淨淨。像「有錢毋好亂亂花」平常講話毋使斷句，大家就知係講「有錢毋好亂亂花」，但係唱歌仔个習慣係「前四後三」个唱法，就變到「有錢毋好，亂亂花」義涵就變淨淨，故所講話做得統一，但係唱歌仔就愛獨立正做得， 改唱「有錢，毋好亂亂花」。。

　　客話推廣乜共樣，為着比賽同考試，該就𠊎講吾个音正著，你寫若个漢字正係正統， 吵吵鬧鬧鬧講毋會分漿。可見為了考試比賽个公平性，不得不就愛用統一个方式。六腔用共樣个詞彙，共樣个漢字正公平。這種統一个結果，嗄將各腔難得个特殊詞彙攉淨淨， 顛倒採用國語借過來个、大家都共樣个詞彙。故所考試教學同比賽，係對保留客家特有語音詞彙盡大个傷害。

　　四縣話个問題還較麻煩，本來無考試無比賽，大家平平講四縣。有兜人歇北部，有兜人歇南部，大家見面相識，和和氣氣各講各个四縣話，無半息問題。但係認證考試推行以後，就開始計較南北用詞同發音各有特色个問題。為公平起見，愛各個獨立正做得，像北四縣話「轉」南四縣話講「歸」，為了保留特色，就愛用獨立个「你轉𠊎歸」，為了統一就愛講「你跈𠊎轉」、「𠊎跈你歸」。另外盡嚴重个係北部人講「鹹卵」南部人講「灰鴨春」，假使係「灰鴨春」分「鹹卵」統一落去，該恁難得留下來帶有製作過程个文化名詞（用火灰攪鹽个夭糊泥來滷鴨卵）就會攉忒，下二擺就無人知過去个客家人鹹卵係仰仔做个。

　　另外北四縣个「矮堵膦」係講人當矮細，企等會堵着人个膦。北部客當輒講「堵吾膦」「還堵膦」等罵語，假使為着統一採取較中性个「恁矮細」，大家正了解，結果「矮堵膦」這个特有个文化詞就會消失忒，其他像「覆菜」變鹹菜，了肖話、猴話改用「粗俗話」， 這種統一个作法對客話歷史來講，係盡大个損失。故所客話推廣，愛用統一个方式抑係獨立个方式，𠊎想大家會認同恁樣个作法：除忒考式教學比賽不得不採用統一个方式來進行， 其他日常生活个語言，還係愛保留各个獨立，恁樣客家个特色詞彙，正有辦法流傳下去。

羅肇錦教授 聲檔 — 客家話个統獨 （四縣腔）

▲BACK