耕心-好食、好物、共好平台

【文、圖∕薛常威∕國立中央大學客家語文暨社會科學學系在職專班碩士生】

 

　　毋知大家有去過「一人商店」無？在屏東市街路頂斯有一間恁樣形个一間小店仔。頭家娘江采薇乜係中央大學个校友，佢開玩笑講自家係「老綁娘」，意思係講歸日掌這店仔，分佢拖等。

　　「耕心-好食、好物、共好平台」係一人小店仔。在一開始个油漆、木工、裝潢，到這下个拚掃地泥、煮飯菜、行銷賣東西、服務人客，大小事情全部係頭家娘一儕人處理，頭家娘講自家當硬殼，店肚賣个東西全部愛佢自家嚴格揀過个，佢一定會先去農場了解食材个生產過程，一定愛係健康、無毒，乜愛佢自家試食過，好食个東西正會分享分大家。

　　在店肚，頭家娘自家準備飯菜，堅持做毋得同時招待超過四組个人客，因為人忒多，忒吵，食飯个品質就毋會好。故所正經愛當好福氣，正有機會享受頭家娘个好手藝。

　　這店仔係「耕心有機植物農場」个實體店面，耕心農場在屏東萬巒五溝村，主要係種神秘果摎樹葡萄，佢兜个理念「回歸原點、大地共生」，用友善大地个方法來耕種，經過加工做成「大地酵素」。故所店肚有賣「大地酵素」个系列產品，還有當多用酵素做个飲料摎點心。佢兜乜有摎社區「共好」个心願，店肚乜順續賣兜在地農民生產个有機農產品，故所正會安到「好食、好物、共好平台」。


　　萬巒五溝算係當偏僻个所在，產業以農業為主，經濟活動無當大，毋過頭家娘兩公婆當堅持，盡煞猛在這位經營，同時用行動宣揚「分自然環境、生產者、消費者三方達到共好共生平衡」个理念。

▲BACK