時計果唱山歌

【文圖／張捷明／國立中央大學客家語文暨社會科學學系在職專班碩士】

 

　　時計果收著信仔，心肝肚乜心心念念豆腐伯姆，毋敢有半下停跎煞煞就出發。一路上礱礱舂舂半行半走，一下無細義嗄來撞著人。厥頭那還臥起就先開聲罵：「奈隻無頭神，行路毋看路。」

　　等佢頭那臥啊起，嗄來嘴擘大大當著驚，噥噥噥噥緊講：「唉喔~！好得無分別人看著，恁見笑，原來係自家無頭神撞著鏡仔得似。」

　　確實無差，頭前个鏡肚真經也企等一個 ── 共樣生到圓滾滾，一身吊菜色个時計果摎佢對面相，共樣嘴擘擘、共樣恁著驚。

　　佢續等愛行，嘴還緊唸講：「遽遽行遽遽行，該豆腐伯姆緊唸，無遽兜去，耳公會癢到堵毋著。」

　　佢既經斡過鏡仔起腳行，臨時又試著奇怪，斡頭看鏡肚時計果个人影，仰般還係恬恬企適該，表情動作嗄摎佢無共樣。

　　這下佢正想著，大馬路上應該毋會有人挑挑放鏡仔，佢又愐下真：「該頭下撞著个係麼儕呢?仰般生來摎共樣~共樣。」

　　時計果就開聲問：「汝係麼儕？仰摎生到全無奈走爭。」

　　該儕人應講：「係『toˇ kie so‵』，吾名係日本阿公安个，愛去豆腐伯姆該位，汝安到麼个名?又愛去奈?」

　　時計果聽著，當生趣个講：「大家喊『時計果』，乜愛去豆腐伯姆个，該就共下行！」

　　去到豆腐伯姆屋下，結果又看著另外一儕人，講佢安著『百香果』，也摎佢倆儕共樣~共樣──生到圓圓香香、一身吊菜色，從對面行等來。

　　豆腐伯姆看著，大家共下來，心肝頭活開，暢到湊等大家共下去卡拉OK唱山歌。

　　原來『時計果』、『toˇ kie so‵』、『百香果』係『一個賊牯三隻名』──共儕人、共一個水果名啦。

▲BACK