陶渭流芳

【文、圖∕徐貴榮∕國立中央大學客家語文暨社會科學學系兼任助理教授】

 

(圖一)陶渭流芳 徐貴榮攝影 (98.10.29)
　　客家有一隻當特殊个姓，抑係台灣正有个，安到「范姜」。在一般客家傳統个建築裡背，正門頂高定著會寫等各姓个堂號，范姜个堂號係麼个呢？佢兜都會寫等「陶渭流芳」，或者「陶釣家聲」，抑係「陶渭傳芳」。這「陶渭」兩隻字並毋係堂號，「陶」係范姓老祖公「陶朱公范蠡」、「渭」係姜姓「姜子牙在渭水釣魚」个故事組合起來个。

　　仰會有恁樣个起源呢？聽講清朝初年，廣東惠州府海豐縣有一個姓雷个婦人家，嫁分范集景，降文周、文質兩個倈仔，無想着老公早早嗄來過身，無法度畜大兩個細孲仔，高不將改嫁分姜同英，大個倈仔文周改姓姜，第二個倈仔文質本本姓范。結婚過後，降五個倈仔，名仔照順序安啊下，安到殿榮、殿高、殿發、殿章、殿爵，全部在姜家成人長大。

　　范文質深深試着後來爺个養育之恩非常个大，想愛同自家五個倈仔裡背，冠姜姓落去，毋過又毋知愛冠幾多個正好？仰般安就毋會勻。背尾兩公婆參詳決定，將就五個倈仔全部冠「范姜」複姓，在百家姓之外自家創造一姓，過身前還九叮嚀十吩咐五個倈仔，決定「從此派下，范姜複姓，歷代想念，永不忘恩」這兜話。因為范文質係范姓第十世，范姜複姓就在十一世个范姜兄弟開始傳下來。

　　早在康熙末年个時節，就有福建泉州、廣東陸豐人來新屋海脣个崁頭屋（今永安）、蠔仔殼港（今蚵間）一搭仔開墾。范姜家族也在這兩時來臺灣開發，起先係第二個倈仔范姜殿高。乾隆1（1736）年，從家鄉陸豐縣出海，坐蓬船到淡水一搭仔登陸，毋過當時淡水附近仔个好所在，差毋多就分學老人佔去吔！無奈何行到還無麼个人發現个新屋來開墾。因為還有當多个地好開墾，一儕人開毋着幾闊，第二年又轉去家鄉，帶等三個老弟共下來打拚，留大哥殿榮在屋下伺候爺娘。

　　范姜兄弟來到新屋，一開始在甲頭屋（今東明村）一搭仔開田，因為人多，發展當遽，范姜家族个勢力緊來緊大，大家尊敬喊佢「甲頭」，佢个庄頭，就安到「甲頭屋」。到乾隆16（1751）年，爺哀都過身吔！留到家鄉个大哥殿榮也過海來到新屋，由殿高公成立「姜勝本」墾號，同官方申領墾照正式開墾，在這開始，兄弟五儕同心合力，煞猛開墾家園。

　　開墾个範圍，東到營盤腳（今楊梅區水尾里）、西到石牌嶺（今新屋區石牌里）、南到社仔溪、北到泉州屋大堀坑（今觀音區大崛里）。經過百零年的打拚，范姜家族毋單止同這兜荒埔變到田園，佢兜嗄變到新屋个大家族、有錢人，還餳着當多人來這開墾絡食。

　　煞猛開墾成功个范姜家族，新屋地區哪仔都係佢兜个田地，人越來越多，屋無罅戴。咸豐4（1854）年，在東片个田項，起過一座新个大屋。第二年完成，起到當整，青堂瓦舍，翹峨翹棟，在當時係一件不得了个大事，大家講來去看「起新屋」，傳來傳去，嗄變到今晡日「新屋」地名个來源；「起新屋」到今變到「范姜老屋」、「范姜祖堂」，係市定古蹟（圖一）。

▲BACK