乞食命 皇帝嘴

【文／何石松】

 

　　乞食命，皇帝嘴，意思係講：佢雖然係乞食命，但係講出介話當準，像聖旨共樣﹗有人講係生活當苦，食著還愛揀牯擇雌，毋知見笑。也有人講係好食懶做，毋知坑窮。其實，驚怕還有更深介內涵，該就係空有滿腹詩書，想愛為民服務介人，嗄無一官半職，流浪在外，滿奈仔去摎人指點，人又看佢毋起，佢也無相干介人。

　　乞食命就乞食命，皇帝嘴就皇帝命，仰般會乞食命皇帝嘴，斯像靚花插在畚箕上，實在係有所爭，正會恁仰形。有人講係羅隱介阿姆，亂講話，害著自家介倈仔皇帝嗄做毋成。

　　因為羅隱雖然聰明，但係生來當媸，庄肚一個姓萬介人輒輒欺負佢，佢當閼，厥姆斯講，下擺𠊎倈仔做皇帝時節，愛摎該萬家人㓾忒佢，毋知講著也講毋著，玉皇大帝話著佢愛㓾一萬家人，該仰做得？所以，佢介皇帝命就無忒咧﹗

　　皇帝命無忒，考試也當毋順利，進士考了七年，後來又考幾下擺，還係無考著，不過，佢有一個當好介女朋友，安到雲英，分離十三年，一下堵著，就講：「你仰般還係青衣秀才？」羅隱聽著當艱苦，堵佢：「該你仰又還係雲英未嫁？」唉，正經係「流淚眼對流淚眼，傷心人對傷心人﹗」

　　也有人講，羅隱祖先介風水係天子墳，兩片龍峎係有100凸，該以後子孫就會做皇帝，但是，兩片山脈斯正99凸定定，還少一凸，正一百凸，為了補這一凸，算命先生喊佢去祭天子墳，愛轉時節，麼介東西跌忒也毋好倒轉去拈，結果佢兜介籃仔毋記得拿著，轉到屋下，又走轉去拈，籃底當當有蟻仔在該寫「天子墳」吂寫好，結果正寫到「天了」，還少一劃時，籃仔就拿走，就毋係天子墳。所以，佢介皇帝命就無忒咧﹗

　　不管仰般，雖然係乞食命，佢還係有皇帝嘴，所以不論佢行到哪，就講出了影響著千年萬載介金玉良言。

　　有一日，羅隱擎等拐棍仔，在外背討食，行悿就在松樹下坐尞一下，無想著屎朏嗄分松油黏著，企䟘起來，褲嗄扯爛咧﹗佢開嘴就罵：「松樹椏呀松樹椏，你萬古千秋也毋會生新芽﹗」轉屋下去摎厥姆報告，厥姆就緊張介講：「松樹毋會生，下二擺就無樵好燒仰結煞？」羅隱安慰厥姆：「噢﹗無相干，該就風吹松子滿山生﹗」所以，這下雖然松樹斬忒毋會生，但是，松子跌到滿天下，山林壁角，崩崗石壁，有縫就會生，生到還較多，正經係風吹松子滿山生。

　　有一日，佢衣衫襤褸，來到種菸葉介人家，佢兜當當在該晒菸葉，佢想賣菸葉介怕已有錢，就愛來摎佢分。無想著，仰般也討毋著錢，還愛摎佢逐走。佢就講：「毋使逐走，菸葉晒到生污垢，發蟲又臭餿，香味跈等走。」正經咧，晒菸葉無恁該，朝晨晒暗夜收，動阿著就有蛀蟲，聽講種菸葉介人，當惱羅隱﹗

　　不過，種麻仔介人就對羅隱當好，有一日，羅隱向種麻仔介人討錢，種麻仔介人當慨，講：「做得，𠊎這下無現錢，等麻仔晒燥，賣錢正分你做得無？」羅隱講：「好，該𠊎就在這等，麻仔現晒現燥，賣介錢像流水，永遠毋會燥﹗」所以，有一句話講：「菸葉難晒，麻仔遽燥」，對人講話，實在已重要啊﹗

　　皇帝嘴講介話全部都會實現，假使佢講愛長生不老，毋係當好乜？佢怕無想著這點，正經係人無十足，卵無滿篤，嗄顛倒講著。所謂天有不測風雲 ，一擺，佢遶山花介時節，堵好落大水，佢遽遽走到老炭窯肚去僑水，佢臥頭看，該炭窯就會崩下來介樣仔﹗佢就講：「這炭窯毋知會瘗下來無？」話吂講恬，炭窯就瘗下來，硬硬就摎羅隱砸死咧﹗

※此處的「介」為大眾通用的「的」，同教育部訂的「个」之意

▲BACK