客家山貓同石虎

【文／羅肇錦∕國立中央大學客家語文暨社會科學學系榮譽教授】

 

　　在人个生活肚，安一个名仔，係當自然當簡單个，有恁仔个東西，就尋一个盡好記盡好喊个名仔來喊佢。像風篩，大風吹來就像篩仔篩東西，搖來搖去搐上搐下，故所安到風篩。但係，恁仔个名稱係在哪盡先安名，个就愛看這个東西盡早在哪盡多。用面前个風篩來講，定著愛在廣東福建浙江兼海个地方開始正著。因爭風篩係海項形成个，故所風篩个名仔，定著係兼海个廣東福建浙江人安个正著。該恁仔講，石虎在台灣主要个生活地域，以苗栗後龍苑裡銅鑼三義山區向南到台中南投彰化這兜地區為主，早期大部分係客人開發个所在，故所石虎个名稱愛採用苗栗台中南投彰化山區客家人个稱呼正係原本个講法。

　　這兜中部山區客人講个石虎，全部人就喊佢山貓，無人講石虎，早期也無聽過石虎恁仔个東西，顛倒識聽過「山狗太」、「田螺狗」這兜動物，但係這兜動物同老虎貓仔全無關係。故所台灣个石虎名稱，用客人講个「山貓」來喊佢較合理。當然，原住民早期个名稱抑係盡原始个講法，但係各族个山貓講法，並無留傳下來，也無流行。另外學老早期講苗栗安到「貓貍」，這係道卡斯（Taokas）話Bali照音翻出來个漢字，客人翻「巴麗」，學老人翻「貓貍」，中華民國國語安到「苗栗」。到這下，算來學老人講个「貓貍」係毋係就係苗栗山區个石虎，這還值得大家繼續研究，也有人講Bali係道卡斯語「風」个意思，恁仔就無可能係石虎囉。

　　台灣个客人喊石虎安到山貓，該表示同客人共下生活个山貓係貓仔。這也表示山貓家貓全部係貓仔，佢个分別係，同人交情較好，肯同人𢯭手捉老鼠，人就餵兜東西分佢食，慢慢仔就歇在人屋下，該就安到貓仔，相對个情形，歇在山項，同人無交情，一直游游野野有一餐無一餐過日仔个就安到山貓。記得還細時節，銅鑼山項个人家，逐家屋人都畜幾下隻貓仔，屋下个貓仔同山貓共樣共樣，共樣會打老鼠，共樣會捉會食狗嫲蛇、老鼠、雕仔，無人畜个就像今晡日个流浪貓就安到山貓。過後，有兜人家在外位捉一般外來个貓仔來畜，這兜新來貓毋會打老鼠毋使同人𢯭手，結果本來畜个貓仔參著新來種草，變來變去，今晡日大家畜个貓仔，續同𠊎還細畜个貓仔無共樣。還細畜个不管山貓抑係家貓全部就係今晡日个石虎，今晡日畜个貓仔係山貓同外來貓合共下，變化出來个混血新貓種。毋過，大家就講這兜雜種个貓仔安到貓仔，純種个山貓安到石虎。

　　這種情形，同原住民分高山族平埔族共樣，佢兜本來係共樣共樣个台灣本地人，漢人來臺灣了後，歇在山項，同漢人無交情个，就講佢安到高山族。相反个情況，同漢人交情較好，肯歇平地同漢人來往，該就安到平埔仔。平埔仔同客人學老人通婚以後慢慢仔就變到客人學老人。變客人學老人个原住民消失忒過後，就講歇在山項無變漢人个人安到原住民。

　　客人个情況乜係恁仔，本來歇在嶺南个瑤族畲族，佢兜本來係共樣共樣个嶺南本地人，別位來个潮州做官个講官話，本地个畬族瑤族學官話晴耕雨讀考科舉，慢慢仔這兜會講官話又識字个人就講佢係中原下來个客人，該兜毋識字歇在較山个，同做官人較無交情，就本本安到山哈活聶畲族，意思就係山項人。

　　總講一句，客人係本地人（嶺南人）佢講官話學漢字，接受王化儒化過後就變客人，自家變客人，就認定係中原徙來个人客，就喊該兜歇在較偏僻，毋識字毋會講官話个人安到山人貉獠安到瑤人安到山哈。講到這，𠊎應當做得講石虎就係客人个貓仔，客人就係嶺南个山頂人。

▲BACK