富岡同窗會

【文、圖∕薛常威∕國立中央大學客家語文暨社會科學學系在職專班碩士生】

 

　　畢業多年之後，同學再過共下聊，就安到 "同窗會"。最少在日本時代，民國五十，六十年該下，還恁樣講。背尾正變到恩兜這下講个"同學會"。2018年正開始，一群畢業30年，毋識再見面，富岡國中畢業个同學想愛在自家个故鄉富岡來開擺同學會，竟然尋毋到合適个所在。

　　當堵好，佢兜在富岡火車頭旁唇尋到一間有70年歷史个肥料倉庫，經過整理翻新，變成一個做得分好朋友，老同學共下坐尞打嘴鼓个地方，這地方使安到 "同窗會"。富岡在日本時代安到“伯公岡”，為到載運新屋生產个穀，政府在這位起一個火車頭，當多富岡摎新屋人在這位通勤上下班，變成三代人共同記憶个所在。

　　富岡一直係個當恬靜个地方，歸十年無麼个變化，2018年9月桃園市地景節在富岡舉辦，確實鬧熱一段時間。一群在地人希望在這同窗會，繼續鬧熱下去，分外地摎本庄人了解富岡這個小地方。

　　富岡還有當多新住民，佢兜大體係來自印尼个山口洋和昆甸，本來就係會講客个華僑，所以嫁來台灣之後乜做得直接摎本庄人溝通，還過富岡乜有當大一群來台灣打拼賺錢个移民工，這乜係一个特色。


　　這下“同窗會”毋係單淨食飯定，還有舉辦各樣个活動，有唱歌、演講、還有為本庄人還過新住民開辦个課程。希望這位所做得變成一個大家做得搞聊个好所在。

▲BACK