得人惱

【文圖／張捷明／國立中央大學客家語文暨社會科學學系在職專班碩士】

 

　　阿明五歲，今年正招老妹，大家都當歡喜，細老妹四只月收涎 該日，大人治雞捋鴨、舂粢打粄、無閒直掣，無人唉乃阿明，阿明就坐到戶木欠上打鼕屈，自家大大聲緊講：「細老妹盡得人惱，害大家無惜𠊎」佢挑挑愛講分大人聽个。

　　阿姆聽著，知講頭擺大家惜佢一儕，加一個細老妹了後，細人仔還毋慣，適該做嬌得似，這央時个大人一定愛多嬌惹佢一下，就跍下去低言細語个同阿明講：「阿明盡乖盡得人惜，做阿哥囉，細 老妹當愛阿哥拐呢！汝去摎細老妹打盎咕，等下姐公姐婆會帶等路 來，看汝做阿哥恁慶，一定會誐腦汝，還會分加兩只糖仔分汝喔」 阿明聽著正歡歡喜喜去同細老妹做伴。

　　臨晝仔，姐公姐婆阿舅阿姨，擐等等路還帶等衫背帶來，愛 送分妹仔揹孫仔，講做得一代傳一代。

　　阿公阿婆看著親家且姆來到，遽遽帶等大家出去迎接，阿姆攬 等細老妹愛分大家看，阿姨阿舅圍兼來講：「盎咕～，阿姨惜，還 得人惜還靚喔！」又用手輕輕仔拈一下細老妹个嘴角，又同細老妹 打盎咕，阿公阿婆看著當歡喜。

　　姐公姐婆也偎兼來，伸手去攬細老妹大大聲講：「唔～！還～ 得人惱、還～蚩喲～！」還牽聲牽到長ˊ~長ˇ長ˇ~，阿公阿婆聽 著還較歡喜。

　　阿明企到唇口聽著，嘴嘟嘟仔講：「大人盡得人惱，𠊎講細老 妹得人惱就做毋得，姐公姐婆講細老妹得人惱，大家顛倒恁歡喜」 大家聽著，謔到費毋直。阿姆跍下來教阿明講：「頭擺人無醫院， 愛蓄細人仔大無恁該，迷信細人仔蚩蚩較會大，較毋會分巫婆看中 意帶走，故所愛挑挑大大聲講：『恁蚩恁得人惱』，意思係講分門 背偷聽个巫婆聽个，也就係講：祝福細人仔乖乖會大，食到百二歲啦」

　　阿明講：「喔！𠊎知咧」講煞，就行到姐公姐婆个頭前大大聲 講：「姐公姐婆還得人惱哦，阿公阿婆還蚩哦！」阿爸阿姆聽著呆 一下，煞煞拉阿明講：「細人仔仰無大無細呢？」阿明就應講：「𠊎愛分阿公阿婆、還有姐公姐婆乖乖會大，食到百二歲啦！」

　　姐公姐婆聽著就講：「阿明个頭顱會分𠊎惜光喔！」

▲BACK