選大老

【文／羅肇錦∕國立中央大學客家語文暨社會科學學系榮譽教授】

 

　　盡早个客話選舉係選大老，「大老」个「老」係「人」个意思，學老話乜安到「大人」，中國古時代安到「君子」，「君子」同「大人」就係分人推選出來管理群眾百姓个人。

　　這兜「大人」大體係年紀較大、經驗較多、能力較強个人，就會分人選出來做「大人」，做「大人」定著愛有德有量、有膽有情、還愛做人公道，無私心、毋會貪財，正會受人尊敬。係無就會分人拉下來，本本做「小人」（小人係講大眾老百姓分人管个人，毋係這下講个「小人」），當然面前講个係早期社會還吂進入專制統治个時期。背尾歸个社會進入君主統治，同「君子」做頭無共樣，「君子」管理係選賢舉能來服務大眾，君主專制係一人專權一人統治。所謂「萬民擁戴」所謂「朕即天下」，該係天下事務皇帝決定，皇帝講个話就係聖旨，無人敢反對，該種情形輒常㩢到昏君暴虐民不聊生，接下來就天下大亂，相爭相殺，你死我亡，最背尾爭贏个人又變皇帝，該就安到改朝換代。這就係中國幾千年來个歷史。

　　一直到清朝末年，孫中山先生推翻專制建立民主以來，歸个選舉制度又恢復選賢舉能个理想，希望選出來个領導人，有德有量，有膽有情，還愛做人公道，無私心不貪財，正會受人尊敬，繼續領導大家同大家服務，係講做來毋好，就用選票來分佢下台。不管哪隻階層个「大人」，做人做事分老百姓嫌，該你就準備下台，換人來管理，這就係今晡日个民主社會用選舉來推出領導人个社會，用簡單話來講，就係「做毋好就換人做」，恁樣就毋會無德無才無能無情个人還長期霸等位仔，害到百姓社會。

　　毋過，民主還吂盡實貼个社會，又乜輒常有人用錢財收買，用霸權惡勢來贏著權位，舞到歸個社會鬍鬚馬膠，一片混亂。故所，一個民主社會，教育第一重要，有知識有見識个選民正做得選出的當个意見領袖，的當个管理領導人才，恁樣，社會正會進步，國家正會安定，百姓正有幸福安樂个生活。
（四縣腔）

羅肇錦教授 聲檔 —選大老

▲BACK