川永有機休閒農場

【文圖∕薛常威∕國立中央大學客家語文暨社會科學學系在職專班碩士生】

 

　　2004年，川永有機休閒農場在屏東縣个客家庄內埔鄉，南大武山下成立，水質好、地泥肥、天氣好个好所在，得到慈心認證个有機農場，堅持用有機栽種，無用化學肥料摎農藥。

川永農場个經營理念係自善心出發，對大自然摎萬物心存尊敬感謝。農場早期係檳榔園，人講「綠金」，毋過對水土保持無好，對人个身體健康乜有壞个影響，故所開始試種新个作物。


　　「諾麗果」就係開發个新產品，變成一個新个品牌 ─ 祖母綠諾麗果，意思係講「諾麗果」就像綠寶石共樣珍貴。這幾年摎屏東科技大學合作，用諾麗果開發出當多樣个健康產品。像有機諾麗果膠囊、果汁、花果茶、吸得凍、酵素等產品。

川永農場乜係一個社會企業，因為內埔鄉係一個人口老化當遽个客家庄，農場做生理得到个利潤，固定个比例會分內埔鄉个老人會，照顧老人家。農場用教育摎示範个方式來輔導社區个村民來參加種植摎推廣，通過整合，用統一个價錢買菜，無使用共同開發个方式來經營，來提高農民个收入。經過客委會个協助，摎南區六堆產業開發成有機健康園地，帶來觀光、休閒、生態个旅行，在屏東起一個祥和有活力个現代客庄。

　　川永農場自農場經營變到觀光工廠，乜有舉辦小學生个農場體驗活動，第二代个後生人徐苑芝表示，種田毋係佢个專長，毋過佢希望分學生學習到土地、自然个美好摎生命个可貴，順帶仔熟識在地店家，瞭解在地个食飯个習慣摎文化，經過食東西來瞭解人摎大自然个關係，分細人仔對種菜、摘菜、洗菜摎煮食个體驗，幫助細人仔了解自種子到桌頂个過程，降低食物里程，又做得培養學生仔對鄉土摎物產个情感，好个食飯个習慣摎觀念做得自小開始。

　　屏東毋係單淨有墾丁，在內埔這客庄，還有這個後生人主持，摎傳統無共樣个農場。


（四縣腔）
薛常威 聲檔 — 川永有機休閒農場

▲BACK