擎飯匙堵貓

【文圖／張捷明／國立中央大學客家語文暨社會科學學系在職專班碩士生、撰寫／黃清蓉】

 

　　阿雄屋下个禾埕盡~靚，四周圍有作圖牆。

　　有一下晝，屋下个大狗牯、適該吠就毋會煞。原來係對門、盡輒佬人咬齧(獻齒ngat夾住；衝突)个阿鬥伯姆，佢畜个貓仔驫入圖牆內肚來。圖牆恁高，狗仔又適唇口吠到lem lem滾，貓仔發痴驚，續得入毋得出，撞上撞下，一下走無俐，就恁仰仔，續來分个大狗牯 咬死。

　　該下晝，阿鬥伯姆，尋貓仔尋到屋下來，一看貓仔既經消忒了，就當閼个佬阿雄其公講：「這隻貓仔，係吾姐婆，適日本皇宮捉轉來畜个，價值無奈比止，𠊎看汝會賠到費毋直著，盡~少乜愛三百萬個元。」

　　阿雄其公，人喊阿戇伯公。聽阿鬥伯姆恁仰講，又無奈詏起勢，愐無計，續無葛無煞。

　　阿雄个阿姆，人喊阿巧伯姆。下班轉來，看到家官坐適該無安無樂，問真仔事情个頭尾了後，愐了一下就應講：「毋怕，毋怕，毋使愁，𠊎有打算。毋過，還係愛請阿爸先詳細愐一下，恩識借麼个東西分阿鬥伯姆，無還个無？」

　　阿戇伯公想了盡~久正講：「有俟有~，毋過~，正一支舊~飯匙定定咧。的盡~久也！該央時，其小郎叔討餔娘，毋罅飯匙過來借，今其姪仔就愛讀書了，奈有人還記得該~支个舊飯匙？」

　　阿巧伯姆講：「毋怕，單淨恁仰仔，就罅佢食毋燥水也！」

　　愛食夜該央時，阿巧伯姆去敋阿鬥伯姆个柵仔門喊講：「有人在無？」。其家官、阿憨伯公適屋肚應聲講：「係麼儕？」

　　阿巧伯姆講：「係𠊎，阿巧其餔娘啦！」

　　義歪~一聲，阿憨伯公打開柵仔門，行等出來講：「呵！阿戇哥个心舅喔！食夜吂？入來共下食好無？」

　　阿巧伯姆講：「無哪，𠊎自家乜煮好，等食夜也！」
　　阿憨伯公聽著就應講：「呵！該就食飽夜，正喊阿戇哥過來坐吓？」
　　阿巧伯姆就應講：「好俟好~，毋過，恁~堵好，該下愛添飯个時節，一~下無細義，飯匙續來搵~斷忒，無好添飯。聽吾家官講，上擺汝討心舅該下，識借汝一支个飯匙，毋知還在無？𠊎想擎轉去用咧！」

　　阿憨伯公聽到佢愛討飯匙，愐了當~久正講：「呵！有啦！恁久个頭路咧，又正小項下仔定定，續來毋記得，實~在還失禮喔！還分汝自家來討！毋過，𠊎記得該支飯匙已舊仔，包尾三窖四窖，早~就毋知窖到奈~隻角落肚仔去了！𠊎喊吾心舅，擎一支新个還汝好無？」講煞，轉身就喊其心舅阿鬥伯姆出來。
　　阿鬥伯姆適灶下，當適該煮等飯，聽其家官適門口喊，正行啊出來，阿憨伯公就講：「前幾年，𠊎佬若小郎叔，討老弟心舅，有去佬佢借一支飯匙無還，今講愛討轉去，汝去擎一支新个出來還佢。」

　　阿巧伯姆聽阿憨伯公講到這，詐意兒當著驚个講：「吓~？毋見忒仔係無？該~就做毋得喔！遽~遽去尋出來，係無，汝會賠到費~毋直著！」

　　阿鬥伯姆應講：「奈~去尋起勢~？怕早~就歿到變麩了~！正一支舊飯匙定定哩，係麼~个膣寶~？恁值錢？」
　　阿巧伯姆講：「無講汝就毋知，這~支飯匙俟！係前朝皇~帝賞分吾太个，有人出五~百萬個銀，吾家官還毋肯讓呢！今看汝愛仰~葛煞~正好哪~ ？」

　　阿憨伯公聽著手緊顫，無葛無煞，阿鬥伯姆一時乜愐無計。
　　阿巧伯姆跈等又講：「聽吾家官講，下晝吾屋下个狗仔，恁~堵好，咬著若屋下个貓仔，阿鬥嫂講，係日本皇室捉轉來畜个，講愛賠三百萬個銀，該今汝又跌忒吾祖公傳下來、皇帝賞个飯匙。該今啊！將就恁仰仔好也哪~，兩儕啊，數堵數、飯匙堵貓打平過，好無？𠊎看，就恁仰仔算數好啦！𠊎來去轉了！正來料吓？」

　　阿鬥伯姆呆適該，毋知好應。

　　阿巧伯姆講煞，就轉去佬阿戇伯公講：「食飯食飯，毋使愁，過乍哩！品無事情。」

▲BACK