獨占台語就係分裂

【文／羅肇錦∕中央大學客家語文暨社會科學學系榮譽教授】

 

　　族群个稱呼或者語言个稱呼，對族群之間个關係，係當容易造成衝突，引起不滿，較嚴重个會發生想無著个錯誤，變成族群對立、社會不安。𠊎在二零一一年識寫過一篇題目安到「台語係使人不安个稱呼」（中國時報）。當時个背景係學老界，緊來緊多人用「台語」來代表佢自家个閩南話。故所發出聲音，分台灣各界人士了解，台語係包含原住民話、客話、學老話、國語，做毋得淨代表學老話。因為台灣追求个係民主，希望形成一個團結民主自由个社會，假使用「台語」來代表學老話抑閩南話，自然就將原住民、客家排除台灣之外，該就表示台灣毋係民主國家，毋係自由平等个社會。

　　當然，社會無公平，國家無民主，假使單淨民間慢慢變化，係一種平和大食細个做法，大家還毋多知仔刻耐仔去忍，民間也較毋會引起大个對立同不安。但係像這擺，行政院長帶頭來大聲呼籲，講台語就代表學老話。該就變到政府公開宣布佢係獨裁政府，公開講佢做得用大來食小，做得專制來決定，用排斥別人个稱呼來代表自家，完全無將別人看在眼內。還較過分个係有兜政府部會个通行公文，慢慢仔就有人開始用「台語」來稱呼自家个河洛話。記得上擺民進黨執政，有人就因為體味著做毋得用「台語」獨占台灣个語言，故所採用音標就安到「台灣通用音標」，無就安到「台灣閩南話標音系統」。還係照民主个規則，去定拼音系統个名稱，至於民間用法抑係大眾廣播个習慣，自然个大食小，𠊎想弱勢个族群，也毋敢當面發譴，造成衝突。

　　總講一句，一個民主社會，絕對做毋得在政府單位，用獨裁个稱呼「台語」來代表學老，恁樣个獨占稱呼，將其他人排斥淨淨。該恁樣，客家話就毋係台灣話咧！當然，客家人也毋係台灣人咧？

　　請問行政院長，恁樣个情形之下，客話毋係台灣話，客人毋係台灣人，該客人愛樣詢同政府合作，客人愛樣詢同學老人團結？

（四縣腔）
羅肇錦教授 聲檔 — 獨占台語就係分裂

▲BACK