木酢達人

【文圖∕薛常威∕國立中央大學客家語文暨社會科學學系在職專班碩士生】

 

十過年前駛車聽過電台廣播「木酢逹人」，係頭輪聽著个。聽著一群後生

人討論仰般對傳統个火炭開發出做得使用个新產品，該當時試著這兜後生人盡有頭腦，係講有機會定著愛去交官支持，無想著一眇jiet目就過忒十過年，正親身去到新竹湖口山林旮旯角个「木酢逹人」這位做拜訪。「回娘家」


火炭係盡傳統个家用燃料，因為分人認為會造成環境汙染，在台灣定定仔就分桶裝瓦斯摎天然氣佔走去。其中个創辦人─陳偉誠个阿爸，做燒樵製炭个頭路，陳偉誠看到火炭个產業緊來緊抹，又看到日本人還摎火炭加工做成不同樣个生活用品。就摎另外三個七年生个後生人在大學該下就開始投入「木酢水」个研究開發，乜摎火炭燒个過程所產生出个氣體，經過凍凝jien、恬放、沉殿等過程過回收製成个「木酢水」，使用在屋下，抑係個人个清潔保養全做得，毋單淨斯對皮膚摎環境好定定，所產生出个垃圾水做得蔭水還做得滋養大地。


「木酢逹人」分傳統个火炭生理變成環保永續產業个一部分。逐款產品包含个天然成份，全部有95%以上，甚至到100%，選用台灣本地个牛眼樵薈萃而成个「木酢水」，自研發、製造到銷貨个過程，全在台灣處理，想望做得翻轉台灣傳統个燒炭業个老樣相，分火炭產業變到還更有價值，這就係佢兜原本个初心。這下超過30零款个個人清潔保養產品，包括木酢洗衫精、洗頭那毛油、灶下清潔、嬰兒用品、保濕凍膜摎護膚乳油等，主要个客群就係重視康健个家庭主婦摎新手爺哀。


正創業確實無恁該，為著愛推廣毋識看過木酢液个相關產品，「木酢逹人」舉辦見面說明會，直接摎消費者面對面接觸；毋單淨恁樣，在研發新品个過程當中，還會寄分較重視个消費者做實際上个體驗摎感受分享，舉辦消費者个評選、試用，參考消費者个意見回饋，做到摎消費者最需要个方向。

「木酢逹人」創業十過年，在湖口客家庄頭腳步企到當在，規模乜緊來緊大，除忒創意摎產品个特別性強之外，還愛有佢兜更多熱愛台灣个心。「無一頭樹，係因為木酢逹人來轉忒个」陳偉誠恁樣形講。佢兜所採取个材料係樹椏，毋係摎歸頭樹仔斬下來。「木酢逹人」乜一直學習，愛仰般形對無聲个環境負責，毋去傷害河川、製作空污摎環境和平共生。「木酢逹人」个成功係後生人摎傳統產業過開發，又兼等照顧環保个良好範例。

▲BACK