手盤摎手背本旦係好朋友

【文圖／張捷明／國立中央大學客家語文暨社會科學學系在職專班碩士生】

 

手盤摎手背本旦係好朋友，共下做事。手盤盡堅耐、盡會忍，梳妝打扮無厥份，燒冷粗事做毋完；手背閒躅躅驚燒怕冷，日日還愛防曬保養。

毋過，就算盡溫純个䘆公乜有三分土性，這日手盤滿腹心酸堵毋著，怨天下大不平，就寫一封信仔投上帝講：「毋係講手盤手背都係肉？仰般做事總係𠊎，閒尞總係佢？」

上帝看過信仔，知講手盤受委屈，就回信安貼佢講：「上帝關了一扇窗，同時又開了另一扇窗，用心看，就會看著𠊎分汝幾多磨練同機會。」手盤怨氣無奈透，奈有體會著上帝个苦心。

下屋也有兩个好朋友，一個安到腳底一個安到腳盤，又乜一儕做一儕尞。

腳底知著上帝回答手盤个話，看著手盤還係無元氣，就勸話佢：「𠊎乜恁做，下崎上崎行無停，熱天受日炙，寒天見風霜，無鞋著驚踢著，有鞋著又難出頭天。」

腳底又溫柔个講：「毋過，𠊎歡喜做甘願受，汝看，因為𠊎腳踏實地，主人正能頂天立地；因為𠊎毋怕路頭遠，主人正能體會麼个安到『行萬里路勝讀萬卷書』。放心啦！光中去暗中來，總有一日會春光。再過講，一點一滴不求回報个付出，本旦就係做人基本个道理。」

手盤聽了後，想著因為自家恁煞猛做來食，主人正能奉養爺哀，還畜恁多大細大，又因為無議無論，㧡起恁多艱苦个事頭，正分人倚勢得，正分人安到雙手萬能。這兜磨練機會毋係逐儕都有个，這兜能力乜毋係逐儕都會个，這正經係一个盡珍貴个光榮。

想到這，手盤無再過怨嘆麼儕，心也活開。故所就摎腳底擛手講恁仔細，又歡歡喜喜去做事矣。

（四縣腔）
張捷明 聲檔 — 手盤摎手背本旦係好朋友

▲BACK