過來講「著」「到」「倒」三隻拉雜詞

【文／羅肇錦∕中央大學客家語文暨社會科學學系榮譽教授】

 

　　這駁仔，手機个賴仔肚項，異多人在該傳國語漢字个重複拉雜个句仔，像「小龍女說：我也想過過過過兒過的生活」，也係像「下雨天騎車差點滑倒，好在我一把把把把住」，無就「用毒毒毒蛇，不知道會不會被毒毒死」，盡尾一句還有恁呢講：「校服上除了校徽，別別別的。」、「我讓你別別別的，別別別的你非得別別的。」這種情況客家話又乜有好多仔像國語重複拉雜个情況，𠊎將佢安到拉雜句。

　　客家話个拉雜句，盡輒用著个係to這隻詞。像「著著獎劵，暢到著褲該下著著雞屎。」、「食毋窮，著毋窮，打算毋著一世窮。」、「倒一頭樹仔倒到斷烏，樹尾磡著油箱，車油倒倒出來，臭到講毋得。」這兜to做得拿「著」「到」「倒」這三隻漢字來運用，「著」做得用到：「著衫」个「著」（zog）、「看著」个「著」（do）、「著作」个「著」（zu）、「著無著」个「著」（cog）、「著歇歇」个「著」（dau）、「黏著著」个「著」（diau）；另外「到」佢係講用到：「一到兩到」斯係拿來做量詞、「寒到打狗毋出門」這係用在形容詞動詞个補語、也係講「顛顛到到」个「到」呢，該就係「倒下來」个「倒」个用法、「到時沒來就高毛仔」這係用在時間个副詞；盡尾个「倒」呢，就較單純，佢用在動詞定定：像「倒油」、「倒樹仔」、「倒會仔」也係「橫倒」、「跌倒」。

　　下擺先來講「著著」這隻字，佢用來盡拉雜，像原在个話講：「衰鳥堵著狂銃」个「著」、也係講「試著當臭，鼻著就想嘔」个「著」、「看著就會流目汁」也係「斧頭削自家个柄毋著」个「著」，全部就to个音，這同學老音个dioh用法非常个相近，該以現下普通話來講，該就用「到」來表示。另外「著衫」个「著」（zog）、「著作」个「著」（zu）這係固定个用法，較無恁拉雜。盡麻煩个係「著無著」个「著」（cog）同「黏著著」个「著」（diau），比將講恁呢个句仔：「朝晨著（zog）毋著（cog）衫，著著（zog do）袖仔黏著著（diau）个領仔分樹奶糖著著（dau do）个衫。」像這長句仔呢，混雜起來用呢，客家話呢，實在呢對推廣來講非常个不利，值得呢大家重新討論，另訂規範，取得共識，再過來學習。

　　「到」个用法，在量詞肚項就較無爭論，像「恁多事做一到包來做淨淨」，厥意思清楚簡單毋會同人混雜。盡特殊个係代表客家特徵用法个「到」，這个係用在形容詞、動詞背尾做一个補語，表示誇大該種比喻。相似講：「冷到激激顫」、「苦到屙痢肚」、「好食到舌嫲就會吞落去」、「譴到爆核」、「暢到核卵就會跌忒」、「想到腳膝頭就會流目汁」，無就「餓到肚屎變背囊」、「坐到屎窟生根」，也係講「走到尾洩屎」、「走到兩腳沒貼地」，還有「屙痢肚屙到胗肝就屙出來」。全部就係誇大个比將講，係客家話形容詞動詞个背尾呢加一個「到」就變到非常生動个說明。其他像「顛顛到到」也係「到轉來」，該係「倒」這隻字拿來借用个，毋過客家話大家就讀「到」這隻音來代用。還有一个用法就係時間地點个副詞，像「到時沒來就死高毛了」、無就「你係到哪位囥，大家都尋無？」个「到」，這係一個改變个用法。

　　盡尾个「倒下來」个「倒」，「倒」佢就單純用在動詞，像「倒油」、「倒樹仔」也係「倒會仔」，無就「橫倒」、「跌倒」這兜个「倒」，个發音同「看著」、「踢著」、「冷著」、「熱著」个「著」（doˋ）共樣，故所寫漢字个時節，一無注意就會寫毋著字 。故所這篇文章題目正會安到：過來講「著」「到」「倒」三隻拉雜詞 。

（四縣腔）
羅肇錦教授 聲檔 — 過來講「著」「到」「倒」三隻拉雜詞

▲BACK