兩子家娘情長

【文圖∕羅金珠∕國立中央大學客家語文暨社會科學學系客家研究碩士在職專班畢業生】

 

七月你過身到這下，熱天過忒寒天咧！心肝頭對你个掛念還係心想牽連。
八十一年嫁來若門摎你共飯甑食飯二十過過年。這份情，仰係一時半刻就做得切得斷、斷得利个呢？恁久𠊎日日打開園門想著你、打開間門想著你、打開冰箱門乜會想著你；看電視想著你、聽著垃圾車个音樂聲想著你，連你留下來个鹹淡乜會想著你。

（筆者摎日夜思念个家娘合影。）
你手尾所留下來該包伙食米，講恁多兄弟愛分等來食，家家戶戶食了做得添福添財又買地。毋過，該包米盡奇巧，佢又碎又脆又綿又黃，儕儕講食著恁難食，吞毋落胲，全部一kuang112仔倒分豬仔食。𠊎講麼个乜毋盼得打爽拂忒若个情，有一日突然間，想著一隻當湛斗个妙計—「打米冇仔」來消化佢。
從熱天過忒到秋天，秋天過忒到寒天。
該隻打米冇仔个師傅，總算來到店亭下个轉彎角仔。寒風利利，陣打陣在店亭下咻咻滾，毋過𠊎內心燒熝熝个熱情，狂風仰般形乜阻擋不了。管佢麼个三七廿一，𠊎食等風拼轉屋下，尋著你所留下來第包尾該包米。準備好一包糖仔、烏麻仔摎地豆米，切一垤老薑嫲、一合香菜仔，沙鼻弄天，用著最遽板个速度再過尋著該隻打米冇仔个老師傅。
𠊎驚妞妞仔摎師父講：「做得翕相、錄影無？」佢無咈𠊎，毋過佢个目神摎笑容回答—「做得」。
翕相機cidcidciagciag个聲，係𠊎對你盡第尾枋無比止个思念。師傅一頭做，𠊎一頭想等你个樣仔，一遍過一遍。毋過想你个畫面，無幾久就分頭家切斷忒去咧！
「你个米仰會恁奇怪呢？」
𠊎心肝有點敗勢，乜斯做得用三條線回答佢！
師傅連連續續又講盡多擺：「你个米啊！下輪毋好再過拿來做咧！實在還媸。」
「頭家師傅，佢有麼个問題係無？」
𠊎正想著眾兄弟姊嫂講，這米恁難食摎佢特別奇考个畫面。心肝愐，這世上敢正經有麼个邪靈个事情麼？想到你慈祥个面神摎𠊎硬埕个個性，還係刻耐仔叮嚀囑咐打米冇仔師傅盡力摎佢做好勢來。
時間溜溜仔，一陣一陣米冇仔个香味─嗯~~~，細人仔時節該燒管肚「碰」聲驚嚇个生趣、大鐵棍仔sia sia sia(鐵棍碾米冇仔个聲音)碾米个感動，還有𠊎對你深深个思念。
時間滴答滴答緊行，老師傅總乜愛展一下自家个功夫係仰般沙鼻，佢暢瀉講：「好咧 !」
毋過，這蠻佢講話个聲還較大聲：「這包米下二擺正經毋好再過用咧！綿綿碎碎，𠊎个糖漿煮恁久還係黏毋起來，實在當怪奇。」
𠊎愐毋解仰般形該量時，無半息仔驚生，𠊎个耳空肚傳來个毋係老師父个siau siauˇ聲(有呵責的語氣形容詞)，顛倒係你溫柔个語音，輕言細語摎𠊎講：「食盡恁多斷截米，愛等哪時再結緣。」
擐等米冇仔轉到屋下，試食無麼个問題過後，再過將你个愛分送出去。雖然講正經無一般个米恁香恁黏，毋過佢盡像客家个你。表面項看起來無幾靚，內心裡肚有隻靚靚關愛个心，想望你个愛永遠陪伴恬恬思念你个人。

羅金珠 音檔—兩子家娘情長

▲BACK