羅肇錦教授榮獲客家終身貢獻獎致詞內容報導

【文圖／客家學院電子報執行編輯】

 

中華民國一百零六年九月二十五日，「全國客家會議暨客家貢獻獎頒獎典禮」在台北福華國際文教會館舉辦，中央大學榮譽教授羅肇錦先生榮獲客家終身貢獻獎的最高獎項。羅教授客語致詞內容整理如下：

各位今晡日得獎个，還有今晡日無得獎个恁多朋友。𠊎企到這位，有兩點想愛講，第一點就講，人生實在亦虛，一 目定定，麼个就會七十歲了。第二點𠊎就感覺自家个擔頭實在亦重，因為做客家語言搶救个工作有三十零年了，𠊎記得年在做該下就講阿姆个話愛摎佢傳下去，毋過做了三十年，你試想看仔，這下做阿爸阿姆這輩个細人仔，當多客話就毋多會講了，故所這下學校肚項愛尋可以教細人仔講客話个先生，差毋多就尋毋到了，這表示麼个意思？年在个母語个運動，無辦法達到救自家母語个目的，今晡日這語言變到麼个，毋係阿爸阿姆个話，變到阿公阿婆个話。像𠊎恁樣个年齡做阿公阿婆个，這下傳个係𠊎這輩做阿公阿婆个話，係加三十年，可能這話就變到阿公婆个話。故所講擔頭亦重，心情乜非常个沈重。其實對客家話來講，𠊎有盡深个感觸，這恁長个時間推廣，為了自家客家个經濟各方面也可以配合等去進行，故所推廣个客家文化个重點變到講各個就愛去顧到，顛倒自家客家本身同人無共樣較特殊性个大家添放忒了，甚至有兜對客話就還希望講用大家較了解較容易學个，恁仔正有辦法接續下去，毋過較了解較容易學个東西就同國語差毋多，恁樣个東西係去講好好保留，等於講客話就無忒了，無麼个用。比將講盡簡單，你係講今晡日愛分大家當遽就了解客家話愛樣仔講，像講「大陽曬屁股」，本來客話愛講「日頭曬屎朏」，「日頭」較無恁好了解，「屎朏」又還啊毋好了解，將就就用國語个方式，「日頭」就講「太陽」，「屎朏」講「屁股」，故所恁仔落去這就毋係特色，毋係特色个情況下，你係去推廣，無麼个意義。故所做傳揚也好，做研究也好，就愛你自家客家肚項同人無共樣个部分好好來傳揚正著。比將講文化肚項，去外國看人个風景也好，生活習慣也好，个就文化同人無共樣，假使講你去到該搭位仔，佢食仔也共樣，麼个就同你共樣，个還愛使你去看，就無意義忒了，故所客家本身文化愛傳下去乜共樣，同大家差毋多个毋使你煞猛去救，就係你自家同人無共樣个特色愛傳下來。下二擺到民主社會肚項，你講愛政府來推廣，推廣麼个，就這同人無共樣个，民主社會就會同你來推廣，假使講你推廣个東西別人乜有，別人个乜共樣恁仔，恁仔愛使你推廣。甚至於講到這十過年客家毋乜搣出客家个花安到桐花來代表，客家日用天穿日來代表，當然這非常難得也達到效果無毋著，毋過吾感覺就係个特色吂裝到當清楚，恁仔个情況去推廣，無辦法推廣到當遠當久當長，桐花有人就講又毋係你自家客家正有桐花，各地就共樣，故所這就係特色無裝到當清楚。你講天穿日乜共樣，女媧煉石補天，看紅樓夢就知，賈寶玉出世口項含等一垤煉石補天留下來个玉仔，故所這故事表示當多人就有，毋係客家特有个，毋係自家特有个去保存毋係盡好个方式，个無辦法當長遠當久，𠊎歸個就提出這隻點，希望大家今晡日得獎个也係今晡日無得獎个，全部下二擺做客家研究，愛從客家本身有特色个地方來下工夫，客家正有辦法長遠，特色正清楚，感謝。

左一曾貴海醫師；左二陳建仁副總統；右二李永得主委；右一羅肇錦榮譽教授

▲BACK