耳

【文／羅肇錦／國立中央大學客家語文暨社會科學學系榮譽教授】

 

講著（耳公），就會走出一个老人家，拉長側側个頸根，用右手按到耳背緊問，（下？你講麼个？算來你講麼个？較大聲兜仔，𠊎聽毋著。下？下？）結果對方譴了，就隨口應佢：上啦！毋係下。還無葛煞。

客人个耳公同大家共樣，係溝通人我个收音機，故所日常時，堵著較耳聾个人，就講佢（耳聾頂碓），堵到毋聽話个人，就講佢耳背背，勸細人仔莫忒多話，就講：細人仔，有耳無喙，恬恬聽！

古人講：不聰不聾，不可為公。意思係講，做領導个人帶領手下，愛學會耳聾頂碓个本等，對手下群眾个批評，愛詐戲仔聽毋著，聽毋清楚，正有辦法化解手下群眾个你爭𠊎鬥。係無恁仔，佢个團體定著會亂亂一團馬膠，無辦法帶領。就以愛講耳公抑係耳空來論，有人就講：耳公哪有分公嫲？愛用耳空正著，公係空个走音。毋過四縣話耳空係講耳公空，愛用耳公正係國語个耳朵，做毋得將耳公講到耳空，結果講毋會分漿，又係一團馬膠。

記得還細時節，爺哀對細人仔食菜飯果品該下，係有細人仔貪心拿多多，大人就會罵：挾恁多，係無食忒就愛塞耳公。這實在係當有智慧个教帶嚇，細人仔哪隻無驚耳公分人塞忒，變到耳聾guang，故所拿東西食，自然就養成食幾多拿幾多，做毋得貪心个好修養。（本文以四縣腔寫成）

羅肇錦 音檔—耳

▲BACK