背祖，一生人苦

【文、圖／彭欽清／國立政治大學退休教授】

 

𠊎个來台祖 22 世對廣東陸豐五雲洞黃荊埔飄洋過海來到竹東，應該係乾隆中期。過了兩代人，地毋罅耕，𠊎這杷人，就東徙西徙，徙到苗栗銅鑼大湖兩合界个八燕坑落食。吾太係在大湖大寮坑个工寮，分原住民用尖尖个竹槓仔鼓着著傷，走轉屋下正過身。 　

𠊎公該下還細，𠊎伯公出外賺錢好分𠊎婆太摎𠊎公有好食著。背尾佢兩兄弟也已增志，各各討有餔娘降有子女。𠊎婆係圓潭仔曾屋人，降四個俫仔一個妹仔，看等地又會毋罅耕了，𠊎公𠊎婆就度等子女摎𠊎婆太徙到大湖水頭寮摎人耕田。𠊎婆吂有60歳就過身， 𠊎婆太第二年也轉家，食到80大零。

𠊎伯姆摎𠊎姆係公館北河人，講四縣。𠊎伯公講：討着四縣嫲了了。驚細人仔毋講海陸，𠊎公就三叮嚀四囑咐緊講：背祖，一生人苦。所以到𠊎這輩仔還曉得講海陸。

𠊎伯公摎𠊎公半夜怕無想着，三四代人過後，子孫有个討學老嫲，有个討外國嫲，莫講海陸，連四縣就挑淨淨。有个還信基督教，無服侍阿公婆，這怕就正經係背祖了。

論真講起來，大陸五雲洞个海陸摎台灣个海陸爭差當多，正經係愛講背祖，怕來台灣無幾久就起勢了，正會有幾下代人無田無地，東徙西徙。背尾，阿公婆也怕聽慣了，抑係驚日後會無人來服侍，正無再過責罰後代子孫一生人苦。

想倒轉來，到底麼个安到背祖？仰會講背祖會一生人苦？值得兜儕好好來思考。

(海陸腔)
彭欽清聲檔 － 背祖，一生人苦

▲BACK