鳥仔毋企樹 羅肇錦

【文／羅肇錦∕中央大學客家語文暨社會科學學系榮譽教授】

 

自然生物界个動物、植物各有各个生存條件同保護自家个方法。動物會停動，故所佢賭著危險就用閃開、避走來保護自家；植物毋會停動ꓹ，就用生竻、有毒來保護自家。

一般有竻个樹仔、草仔，抑係有毒个菇仔、葉仔，就係植物保命个方式。生竻个植物一般係在葉仔果子頂上生當多竻，動物毋敢行兼去食厥葉喫厥子。像林投(na dau)ˎ、黃梨有尖尖長長个竻，無用刀仔削忒，你就無辦法落嘴，又像咬人貓、雙面竻，歸樹誒就係針毛、尖竻，分佢刺著，該就費毋直。

再過來講，樹仔草仔生竻个作用有防動物喫嚙，像雙面竻葉仔中央正反兩面，就有尖竻，動物毋敢惹佢，有保存水分莫分佢焦忒，故所仙人掌生在缺水个所在，定著愛生針葉，正毋會水分大風吹分日頭曬，無幾久就蒸發淨淨。

另外，生竻做得漛手藤仔攀爬，像犁頭草（葉仔像犁頭，學名扛板歸），就係藤仔葉仔都生淰短竻，遞藤就靠這兜短竻，一步一步攀等上。還有生竻係為著黏到動物个毛，借佢來將果莢散布出去，像蝨麻頭（客語）或蒺藜草（學名），就係靠有竻正做得傳種。

其他客家地區盡輒看著，歸身就竻个就係黃藤、見笑草、鳥仔毋企樹。黃藤以前當有名，細人仔毋聽話輒常愛食黃藤正會大，學校先生也係會準備黃藤服侍當撩刁、當番綻、毋肯寫作業、考試當濫个細鬼仔。該在打人个黃藤，全部竻就刨淨淨正拿來用。係無斯，黃藤竻打落去，定著歸手歸腳血流血著。

見笑草係山項路上，滿哪都係。梗上有竻，葉仔開開，分東西觸到，跈等合起來，像驚見笑樣仔，故所學名安到含羞草。最特別个係鳥仔毋企樹，一般路項山項當多樹梗生到淰淰个竻，樹葉仔也係頂面翻面就生到淰淰个竻，莫講人毋敢惹佢，連鳥仔就毋敢企到厥頂項，故所安到鳥仔毋企樹。

鳥仔毋企樹學名係白赤蔥，因為赤蔥係當有名个香料樹，厥俗名也安到鳥不踏，其實就是鳥仔毋企个意思。有差別个係，白赤蔥樹梗同樹葉背層係灰白色，葉仔味道無像赤蔥恁大馦，較無人拿來做香料炒菜，故所當少人知厥名仔，客話係鳥仔毋企樹。（本文以四縣腔寫成）

羅肇錦教授 聲檔—鳥仔毋企樹

▲BACK