【文╱賴振員 (國立中央大學客家語文研究所研一生)】
老街長約三百公尺，寬闊介亭仔腳，顯示出特有介氣派。老街介另一遍係佇立了三十零年介天主堂，因著愛而存在。1953年，陶神父在老湖口設立細細介圖書館，再過一年後又在老街上買了幾棟民屋傳教，後來因為教友超過兩百人，1965年神父又買下了目前介所在，開始建築現在介教堂住所。陶神父佢係義大利人，佢係最先派來裡位介神職人員，後來還有六、七位介神父先後到來管理裡位介傳教活動，佢兜全部都係義大利籍。
天主堂在該當時所扮演的角色，根據嗯兜了解，因為在物資缺乏的年代，一般人介生活清苦，居民並不富裕，擁有救世熱忱介教士看到居民介窮困，就發起了救助貧困介活動，像麵粉、衫服、牛奶等，讓大齊家排隊去領。除了提供物資介幫助外，天主堂也有向居民提供當多介精神慰藉，每個禮拜都會舉行主日彌撒，居民教友都很熱心參加，教友也當多喔。
其實在更早介年代，現在介天主堂舊址，聽講就係老湖口介火車站。在清潮時代，火車路原來係從楊梅到大湖口，再經過紅毛田，後來因為裡條火車路較陡，火車頭到裡就拉不上了，故所日本當局就將火車路改道。改道之後，火車路就係現在介楊梅、富岡、湖口、山崎、竹北裡條路線了。羅老先生講，記得民國十八年十月一號，火車頭就遷出老湖口了，從此以後，老湖口介地位就落價了。
民國十八年火車頭遷出老湖口之後，裏位就荒廢了侵久，一直到三十六年天主堂搬入來，火車頭的地跡就漸漸嘸見嘍。嘸過天主堂在裏位也只有三十一年介光景，於今也已嘸人使用，空蕩蕩介宗教建築停兜介，變成了湖口老街介地標嘍。
天主堂附近介屋街，全部係一層介矮屋，係樑柱瓦屋，裝飾較少，亭仔腳較閤，沒老街介按闊。介位有一個郵便局，太約係民國十三年成立介，一直到三十六年介六月初一，遷移到新湖口介孝勢村忠孝路介位。其中也有變電所，也跈郵便局來搬到介位去，後來介著位所就起了戲園（院）。
「太約四十年唷，還記得。」羅老先生講：「該當時有一個姓汪介外省人，戲園就佢開介」「該當時兵營就在老街介山窩肚，阿兵哥也要娛樂哦！」該當時係做兜麼該電影？崖問。「喔，有做電影介，有做歌仔戲介，也有做採茶戲，有時也有做歌舞團，盡有意思啦，哈哈！」「崖也識看過幾電影，像『粱仙伯撓祝英台』、『李三娘』，有時也會做兜介日本片，像『里見八犬傳』、『雙姝戀』，該當時，太人細仔全麼有落過該戲園。後來在民國五十年時，汪先生搬走了，戲園介笑聲、人聲跈攆就無影無跡嘍。」羅老先生緊講，面上也浮現出有兜介感慨。
謝了羅老先生，恩兜人繼續探訪。看到一家騎樓介樓牌刻有「萬勝行」介水泥浮雕，不過店內卻係一間現代化介超商，落去了解之後，原來係湖口國小戴主任介公子開介，戴主任知崖兜係中大客語所介研究生，當暢，就請大齊家落去坐聊，並泡了一壺介「長安美人茶」請恩兜。「戴家以前在湖口老街有盡多介店面，以前裏間雜貨店係全老湖口最太間介，除了萬勝行，崖兜戴家還有義信行、義勝行，還有一間介老酒店，只是裏下時代沒共樣嘍，新湖口開發了後，裏位一間間介店漸漸關門了。」看到該當時介酒壅裏下變成了古董，感嘆時代介變遷。
（未完待續）
