【文╱賴振員 (國立中央大學客家語文研究所研一生)】
羅榮富老先生，現年八十二歲了，佢係一介老實人，從細就生長在湖口介老街上，佢對老街介演變過程有罄深介了解，等一下嗯大齊家來謄佢佉老街遶遶看，作一個深度介探訪。
裏下，嗯你來先介詔lia位德高望重介羅老先生，老先生生有兩男兩女，各有歸宿了。大介妹嫁到台南，做人介阿婆嘍
；細介妹嫁到附近沒當遠，閒時會轉來看看佢老人家，當有孝心；大介賴仔（兒子）鐵路局上班，舊年正退休；細介賴仔係一個漢藥先生，在附近開一間中藥店，生理當鬧熱。羅老先生本人係退休介國小先生，教書也有幾十年嘍，裏下做人介社區發展學會介顧問，對人罄熱心罄客氣，做人介公太嘍，身體還當砸磳，在家含貽弄孫，罄有福像介老人家。於今得到佢介同意，隨大齊家來走訪湖口老街，作一次尋幽覽勝之旅。
緣起：
湖口老街，做麼介從商業當盛鬧熱介市街，變成平靜介住屋呢？佢堵到麼介轉折？又有幾多人曾經踏上裡個士地上？過後又為麼介來離開？歷史上無識來為裡條街下過註腳，隨著歲月介流逝，景物介變遷，嗯妳讓驚覺到佢介存在，就像鍚鋼（磁鐵）一樣，吸引了按多介人來參觀，其中介懊妙係麼介？係吸引了嗯妳採訪介理由。
訪述：
時間係2009年9月初6禮拜日介早晨頭，太約十點左右介時間，崖約束了幾位好友走訪了在新竹縣湖口鄉湖口村介一條舊街--湖口老街。佢沒按多介聲音，也沒過多介喧鬧，只不過係一介單純介一排住家屋。
在沒當久介時節，裡條老街也有過罄鬧熱介風光，車水馬龍介人潮，做得講係風華一時喔。不過，好景不常，佢在時光流逝介歲月裏不再繁華，不再吸引人群。裏下介老街只係嘸聲介佇立在老湖口介士地上，其間介轉折係麼介理由？直得嗯你來玩味。現在大齊家就來跈羅老先生來尋幽訪勝，行一遍古蹟之旅，娓娓道來。
羅老先生講，湖口本來嘸新舊之分，後來新湖口鄉鎮介興起，為了分別，讓有「新湖口」、「老湖口」介分別。湖口老街就座落在老湖口介老地上。
老街係在民國三年（大正三年）起介，大部分地係羅姓地主，當初商人來租地起屋，全係口說為憑，繳幾多介租金全憑信用，只靠一張嘴就講定了，哪有麼介契約書？
講到老街屋舍介建築，佢介式樣較特殊，係客家方式摻雜羅馬巴洛克樣式，介兜剪粘雕塑全係當工夫介，裏下一般人就不講究了。雕花色彩沒退色介原因係該當時介師傅，用生石灰撓鳥糖來攪拌，再加兜松仁，就按就嘸會退色嘍。至今在老街上，有兜雕花部份已經脫落，但是曾經附著介顏色，仍隱約可以看到。介建材哪位來介？羅老先生講，日本時代，山崎（新豐）地方當多磚窯，老街介磚就係哪位載來介。木樑係福州過來介，就係福州杉啦。
民國三年起介「老街」，在該當時係大湖口地區介一大盛事，不但商家幾兜有所期待，旅行者對佢愛護有加，附近居民也對佢十分好奇。事實上，在老街起建之前，前後兩遍介地區，就有幾條介民街先存在了，佢兜介起建年代根據現在住在老街的居民講，在民國前就有了，起建日期同老街差不多。「老街」落成之後，火車站也有了，歸條街全部有做生理，鬧熱煎煎，無閒趑杈（ci
ca），有人做到笑嘻嘻仔，有人做到頭犁犁仔，當時該景象裏下已經嘸了。話講轉來，嗯你看佢房屋樣式，外背用土角磚砌成，屋內雕樑畫棟，在該當時應當係大戶人家讓起得來。聽講當時居民太部份係姓「葉」，不過，裏下老街上最多的居民係姓羅。在清朝移懇時代，羅家就係老湖口介大地主。民初時節，四方商人都向羅家租地起屋開店，一間間介紅磚屋就按起來介，成就了裡條老街。（未完待續）
