【文／謝毓濱 (國立中央大學客家語文研究所研一生)】
雖然吾身項有一部分客家血，不過正經接觸客家是在大學讀書个時節。從細到大無識認識客家，阿爸身項尋毋到客家身影，連粄仔乜毋識聽過。有仔正伸厥海陸話定定，佬去掛紙ka55下會聽到个客家話，當下正知自家有客家血統。其它全部是過河洛人个風俗。
在吾細漢時節，輒輒聽到阿爸佬阿姑講等聽毋識个話，該央時想應該是大人毋想愛分恩細人仔了解講話內容。讀大學以前，不知身有客家血統，乜毋知阿爸講个聽毋識个話就是客家話。以前捱聽仔識河洛語佬國語，毋識客話，這下講个四縣腔是在大學學个。
從國小到高中吾學校無識教過鄉土語言。該央時鄉土語言對我來講是屋下講个話，會講幾句定定。吾阿公阿婆當早就過身了，加上吾爸當細漢就出外尋頭路，故所吾爸講个客家話無恁多，其中有兜詞彙會用河洛話代替，總講河洛話佬海陸話有當像个地方。不過吾爸佬阿姑試著吾四縣話比佢兜還卡正，佢兜認為四縣腔正是正統客話，可能是受著四縣強勢个影響，比論講這下火車个客家話廣播還是四縣腔，連新竹站乜共樣。
最後，身為廣義个客家子弟，因為背景佬客家庄个客家人無共樣，故所對客家族群有卡特別个想法。就像舉辦客家認證會破壞客家話个多樣性無?
講四海腔或者客話分河洛話影響个客家人，佢兜講个話輒常分其他客家人笑，講个是無正客話，毋過厥歸屋下全部恁仔講，請問佢兜要考哪種腔調?還有假使老輩人無在了，該兜情形敢會佬客家話變成一个伸四海大平安个語言?這是當嚴重个問題。這下客話受著國語佬河洛話影響盡多。當多詞彙已經直接從國語翻過來。故所希望客家話做得流傳千古，客家諺語：「寧賣祖宗田,不忘祖宗言,寧賣祖宗坑,不忘祖宗聲」，無客家話就無客家人。第一擺用客話寫文章，還請各位先進多多指教。恁仔細！承蒙！
