【文／黃元姜 (國立中央大學客家語文研究所研二生)】
「先生，恁仔細！」
一位瘦夾夾个婦人家，緊佬阿米先生點頭緊講：
「先生，恁仔細！」
「先生，恁仔細！」
「無你个話，吾賴仔毋知會適奈，一定無像這下恁有才糶。先生，恁仔細。」阿米先生緊想這个婦人家係奈隻家長。分佢想起十過年前，正畢業，來到泰安鄉下个國中。日時頭，天氣異好風溜溜仔鳥仔唧唧揪、暗埔頭，星仔滿天金那那仔拐仔ㄝㄝ滾。
阿米先生盡記得就係歇適鷂婆山下个矮屋仔个阿詳，佢逐日行路去三公里遠个中學校讀書。自家一儕人慢慢行、慢慢看，從日頭還沒出來，行到月光落山，看到拐仔還講：「恁會早」，鳥仔乜緊佬佢講：「吱吱吱」，成時適路上堵到同學，大家還會緊行緊搞，實在還暢。烏疏疏个阿詳好搞、好食，就係毋好讀書，逐擺上課就啄目睡，下課就係一條龍，講著食飯走盡快。害阿米先生毋知愛仰葛煞正好。
一日，阿米先生看著阿詳食飯个快樂樣仔，就有一隻想法，「做一個廚師」應該會過較好。
佢就當積極去佬阿詳談、甚至佬阿詳講心事，兩儕像子爺樣仔，當親密。詳畢業過後，考到五專餐旅學校、考到證照，甚至去到法國學習還較好个技術。有閒个時節，還會轉到鄉下，佬親戚朋友打嘴牯、佬教過佢个先生打招呼，感謝先生个煞猛，無放棄佢兜。
「先生，恁仔細」係阿米先生煞猛結成个果子，也分佢有繼續打拚的心情。
