【文／戴伶伊 (國立中央大學客家語文研究所研一生)】
今年暑假，捱參加高雄市政府客家事務委員會舉辦个「2008南台灣客家菁英論壇」，這个活動從八月二十九到三十一全部毋使錢，有一百个大專院校學生，共下來認識客家文化。
這三日有先生教恩俚認識客家，先生都係研究客家文化、語言佬文學，比如講曾彩金、劉明宗、鍾鐵民、吳錦發、曾喜城、俞龍通…等，佢兜盡煞忙教學生，雖然在這一百个後生肚，有一半係閩南人，毋過先生還係講个當精彩。今年金曲獎得主黃連煜乜有來，佢面對面佬後生分享感想。
除了上課研習以外，乜安排後生去六堆地區个客家聚落做參訪。台灣客家人口地區分布盡多个，除了桃園、新竹、苗栗以外，就係南部六堆，這个地區在高雄縣有美濃、杉林、六龜，佬屏東縣高樹鄉、長治鄉、內埔鄉、佳冬鄉、新埤鄉、萬巒鄉、麟洛鄉、竹田鄉等8个鄉鎮。
捱有去看客家建築、文化佬食客家美食，捱知得麼个係敬字亭、棟對佬堂號，還有客家人失傳个菸樓、美濃客家人晴耕雨讀正會有恁多博士，恩兜乜騎車仔遼中正湖，中正湖這片地方當靚當清靜，盡合適大家去个片行行吔。
這三日當生趣，毋過盡無采个所在，係先生當少佬恩俚講客家話，因為有當多个人聽毋識客家話，係無捱認為加減要教一息息个客家話，恁樣正會知客家話个生趣，乜有較深入个認識。
