【文／彭瑞珠 (國立中央大學客家語文研究所研一生)】
八月半轉苗栗，對面个阿龍哥包袱仔背等過來尞，大家笑佢講：「阿龍哥，汝要離家出走係不係？」。佢講要去「紫明宮」同其姑丈學誦經啦！捱講：「个阿龍哥，汝係誦國語、福佬也係誦客家話哩？」佢應捱講：「大憨嘛，吾姑丈就恩海陸人，當然誦海豐哪！」不會增差！捱同阿龍哥共樣姓彭，從小到大，大家講四縣。不過，吾公同其公係同小人仔講海豐个。只是，捱等後生人四縣講慣哩，海豐顛倒抝不轉來哩！不過，師傅姑丈還係教海豐，師仔外甥當然就係誦海豐嚕！
讀研究所以前，逐禮拜二暗晡七點半到九點半，捱會去「中山國小」學唱山歌：這个山歌班一期十二禮拜，正繳一千個銀，係少數還有弦鼓个山歌班。不多知仔，就唱了一年零，先生大體教「三大調、小調佬流行歌曲」，大家唱个係四縣山歌。有時，同學阿叔、阿叔姆還會教捱講：「唱山歌就係用四縣，腔正對！」捱憨憨跟先生嘴尾仔學唱，唱忒年零，山歌還係唱到「阿里不搭」。連「平板」就還無自家个風味，莫講「老山歌」，亦係「山歌子」哩，有夠難个啦！桃園、苗栗極多山歌班个師公、師太係謝其國先生佬賴碧霞先生。故所，捱等大體係兩位先生个徒子徒孫。
看了鄭榮興先生个書（註），正知得，大陸還有「海陸豐山歌」、「饒平山歌」……。「三大調」也應該安到山歌个三種「腔」，不係「大調」。原來，佇台灣大家會講「四縣山歌海陸齋」，也係因為時行佬師傅个關係。
註: 鄭榮興著 「台灣客家音樂」 晨星出版 二００四
