國立中央大學 客家學院 電子報
上一期講著沖繩、石垣島客家研究个特色，今晡日就來講去到沖繩過石垣島个過程。講來乜已心色，因為係第一擺去日本，故所乜會當緊張。去到機場掛行李，嗄排隊排了差毋多有二十分鐘，結果一上了飛行機，該位仔吂坐燒來，就愛下飛行機了。第一站係去沖繩个那霸（Naha）。第一擺去日本，一定愛學个係坐佢兜个電車，實在已方便，對機場到旅店，坐幾站仔電車就做得到了，毋過這恁細細段个距離，就愛三百箍个日本錢，差毋多係60箍新臺幣。到了旅店以後歇睏一暗晡，天光日就愛去石垣島，𠊎試著在石垣島較有民族風情个展現。在那霸，都係一大堆个「觀光客」，你在那霸，堵著偎正手片行、還有擐等免稅袋仔个人，大體就係臺灣人。到了石垣島，就係像臺灣个澎湖、韓國个濟州島共樣，有海島風情。石垣島摎金門乜已相像，都係有屋簷，屋角乜有做形仔，還有為著鎮等風，莫分風恁傷人，還有避邪、祈福个功能个「風獅爺」。
𠊎兜在石垣島遶尞歸日，去看當地个風景，看風獅爺个各種變化，乜去看了當地防風林个植物有哪兜，分𠊎印象最深个係，該片个林投樹，該果子，就係林投果，該斯比排球還啊大，實在分人驚。看忒這兜个風景以後，一定愛去等路店看一下有麼个東西好買，沖繩、石垣島个名產有鹽、紫薯、紡織工藝、烏糖。𠊎斯分該兜恁有特色个等路餳著，就買了一領衫，還有一隻紡織工藝包。斡回正題，𠊎兜人在石垣島落腳个地點係「白保」，該係海脣个一隻細莊仔，一行到該，𠊎就想起在花蓮个老屋，去市區駛車愛半點鐘，喊無計程車、歸莊仔正兩三間雜貨店，實在還有轉屋下个感覺，在旅店食夜个時節，乜同頭家、頭家娘打嘴鼓，佢兜還教等𠊎兜跳等沖繩个舞、唱等沖繩个民謠，這旅程會緊來緊生趣哦！
〈此次日本移地課程，由客家學院USR團隊執行教育部第三期(112年－113年)大學社會責任實踐（University Social Responsibility,USR）計畫：「海好友你——桃海三生開闊國際夥伴永續力」計畫所辦理。〉
〈客家學院USR計畫長期在桃園沿海推動永續發展，並致力於石滬文化的保存。此次延續2023年6月辦理的「石滬保存維護國際研討會及現勘交流計畫」，持續與日本筑紫城學園大學上村真仁教授合作，籌辦了「臺日沖繩石垣島交流計畫」，計畫結合「東北亞社會文化田野實作課程」，學生在臺灣先修習課程後，於2024年6月6日至12日前往日本沖繩石垣島進行田野調查，以探查石滬與地方創生為主要方向，增加臺灣與日本石滬保存方面的國際鏈結。〉
