國立中央大學 客家學院 電子報
有一日下晝，𠊎跈阿婆共下去屋下附近个大圳溝行行，路脣有一叢草，打當多細細粒烏烏个果子。阿婆摘一粒，在衫褲擦擦就拿來食。
「阿婆，你仰儘採摘東西食！」
「憨嫲！這本來就做得食。𠊎做細人个時節，無錢買糖，就在路脣摘這來食。」
「該味道仰般？」
「酸酸个。你愛食食看無？」
𠊎緊搖頭，毋敢拿來食。
𠊎從細戴街路，隔壁賣胖个店也有賣糖摎餅。阿婆惜𠊎，逐日會分𠊎十箍，儘採𠊎想愛買麼个。該時，甜个乖乖正五箍，做得食，又送搞个。還有口紅糖、森永牛奶糖、圓圓个鐵盒仔裝个水果糖。雖然無像這下7-11恁多種，毋過對𠊎來講，隔壁个華洋西點麵包店，就係細人个天堂。
兩年前，𠊎搬到這下戴个地方。這係重劃區，無像頭擺戴舊街路恁方便，愛去7-11愛行十分鐘。滿哪仔起屋，𠊎逐日用嬰仔車渡兩歲个多多去公園尞。有一日，𠊎看着隔壁大樓个壁角，生一大叢草，打當多粒烏烏个果子。𠊎看過這種草，毋過喊毋出佢个名。
𠊎用手機翕張相片，放着臉書。一下就當多人撳湛。有朋友在相片下背寫着：「我們家也會吃黑甜仔菜，都是吃葉子，先燙過再用麻油炒薑或是煮稀飯。」𠊎正知原來這草還做得炒來食。𠊎用「黑甜仔菜」去估狗尋，尋着當多無共樣个講法。華語安到「龍葵」，河洛話安到「烏甜仔菜」，客話有人講係「打烏子」，還有人講「烏嘟子」。毋過，𠊎記得阿婆講个毋係這兜名。
毋知係心靈相通無，阿婆該日下晝打電話分𠊎。
「阿婆，你記得你頭擺識摎𠊎講過，你做細人个時節，會食一種烏烏个果子。」
「烏鈕子喔？」阿婆一下就喊出佢个名。
「係啦！烏鈕子！」
𠊎緊念佢个名，又教多多：「這安到烏鈕子喔。」生祥樂隊有條歌就安到〈打烏子〉：
打烏子 烏鬼仔菜
Tatokem 白花菜
喊我介名
我怕知汝奈耶來
作小冬摘菸犁番薯
我有果甜惜汝介苦
炒麻油煲粥雞春湯
我葉苦甘專汝來嘗
這條歌係林生祥寫曲，鍾永豐作詞，歌曲當有畫面，美濃个山、美濃个田，細妹人在灶下無閒，摘菸葉又耕田。𠊎也想着細細个時節，阿婆逐日煮食，下晝頭有點時間，渡𠊎滿哪仔去行行。
𠊎再過去尋該叢烏鈕子，已經分人拔忒了。毋過，無關係，烏鈕子恁會生又耐命，當遽就做得在別位尋着佢。該時，𠊎會一下就喊出佢个名，阿婆摎𠊎講過个名，烏鈕子。
註：為着尊重作詞个人，〈打烏子〉歌詞用作詞人原來个寫法。
