國立中央大學 客家學院 電子報
還細時節，見做鬧熱，已多親戚朋友會來屋下。食飽晝人客毋係去廟坪項看戲，就係在屋下打嘴鼓，有兜人盡久無看著吔，有當多好譫誃。
恁多親戚肚項，𠊎印像盡深个係阿金姑婆，因為佢略略仔缺嘴，頭那毛無已多，毋過盡好講笑，用這下个話來講就係已樂觀。
阿金姑婆同厥倈仔阿文叔一屋下人歇在山林壁壢角个南湖坑尾，自家有園有田，日仔過來無已豐湧，毋過食著毋使愁。
𠊎從細仔逐年掛紙，就會聽老輩个講吾公太係在大寮坑掌工寮，暗晡頭分原住民用尖个竹槓仔鼓著著傷，走轉八燕坑个屋下無幾多日就過身。吾太身下有兩個倈仔，吾伯公過吾公，一個妹仔細細仔就喪忒，同祖公祖婆葬在共門風水，碑石項鏨有彭姑娘三隻字。𠊎問吾姆該阿金姑婆係仰仔來个呢？
吾姆講，阿金姑婆也姓彭，一生人命已歪，佢本來乜係八燕坑人，歇在吾婆太个上屋，嫁到峎背南湖坑尾个陳屋，下後厥爺哀過身，妹家無兄弟姊妹，佢就認吾婆太做哀仔，準妹家行。厥爺哀个風水在八燕坑有應公附近仔，佢逐年會去掛厥爺哀。
阿金姑婆降有兩個倈仔三個妹仔，阿丈公四十零歲仔就過身，吾姑婆自家一儕人愛勾惹一群大細。佢盡擔硬，做到有日無夜，等到兩個倈仔結婚降有子女，擔頭正有較輕，無想著大个有一擺㧡香茅嗄種到崩崗下著傷過身。
吾公同吾伯公在八燕坑个地毋罅耕吔，吾公就帶等吾婆太過四個倈仔徙去大湖个水頭寮做佃農，吾伯同吾爸就在水頭寮討親。吾姆講屋下有好歪事，無就過年抑做鬧熱，阿金姑婆都會來。
吾婆太食到九十歲正過身，還山忒無幾久，吾爸就去樟腦局做巡山員，帶等吾姆過吾大哥去當時苗栗大安个司馬限、盡尾山、燒水這兜深山所在歇在結所（宿舍），到吾四個阿哥同吾姊讀公學校該下，吾爸在大湖上坪謝屋个地項搭一間虎尾寮分細人仔好歇，請吾公掌等。
日本人降服過後兩年，𠊎三歲，吾公過身，吾爸決定帶吾姆過𠊎對燒水徙到上坪，親戚朋友又較有來去吔。阿金姑婆成下仔上街會來吾屋下尞。厥倈仔阿文叔降四個倈仔三個妹仔，高低佛仔个大細，愛食、愛著、愛讀書，下下愛用著錢，阿文叔兩公婆，日合夜愛耕田、做山事，有閒還愛去外位做零工，吾姑婆加減愛𢯭手。
佢同吾姆講，大个孫仔阿財仔頂彭屋，好傳彭屋个香火，這個孫仔已弱身，佢盡愁，毋過佢講佢看已開，認分就好。
下後，阿文叔賣忒大部分个山田過山園過過借兜仔錢，去白布蓬買七、八分田來耕，水足泥又肥，榖个收成比山田仔加加幾下倍，阿金姑婆會暈車，無跈下去。無想著，民國五十二年葛樂禮大風搓，發大水，白布蓬穿䃗，阿文叔个田總下畀打淨淨，好得南湖坑尾還有老屋過幾坵仔田過幾甲仔園仔，毋過日仔過來已艱辛。
大湖係有做鬧熱，阿金姑婆還係會來，還係好講笑，毋過試著老加真多。民國五十八年，吾姑婆過身，阿文叔請吾爸代表妹家去點主、封棺，𠊎同吾爸共下去。看著阿金姑婆个相，略略仔缺嘴，頭那毛已少，毋過還係笑微微仔，正經過吔擔硬樂觀个一生人。
