國立中央大學 客家學院 電子報
常常聽人講，轉到屋，看著屋下人咧，該正係家，為著家，可以情到深處無怨尤；共樣，該表面冷雪雪介數字，係講，能夠注入春風十里情，可能就無共樣。斯像過年過節，送人等路，大部份愛湊雙，比論講一對紅粄，一對米糕等，有雙雙對對，萬年富貴之意。原來，數字毋係無情物，用到真情韻味深。
一般來講，數字分為奇數，偶數兩種，這係數學課介講法。傳統介講法，分做陽數、陰數兩種，也就係單數摎雙數。一三五七九，安到陽數；二四六八安到陰數。摎數字分陰陽，分男女，變做一隻有情世界，你需要𠊎，𠊎也需要你，所謂獨陽不生，孤陰不長，各有特色，共生共養。數字，也像人共樣，非常有感情介。
數字，佢係團體生活介，儘少單鳥仔出門，從細斯愛大家共下較生趣。所以，北宋哲學家邵庸，細人仔時節，有一擺，跈等厥姆出門，看著萬紫千紅介春天，一歡喜，斯寫出一首﹤山村詠懷﹥介數字詩，該就係：「一去二三里，煙村四五家；亭台六七座，八九十枝花。」係仰般靚介春天景色啊！數字，摎春天結合，會分吾俚心情鬆爽。適當介運用數字，也可化解心焦，比論講，所駛介老爺車，常常故障，毋出門毋壞忒，看看會赴毋著咧，實在急死人。無相干，請念念下背這幾句：「一駛二三里，壞忒四五擺；整忒六七次，八九十人拉。」心情係毋係下好兜仔？
人愛能夠了解數字，乜愛認識生活，像該一到十歲介童謠，非常搭句，𠊎從細斯念到今，毋會毋記得，該就係：「一歲嬌，兩歲嬌，三歲撿樵分姆燒。四歲接線，五歲經布，六歲繡花，七歲繡出牡丹花，八歲食娘飯，九歲理娘家，十歲渡子轉外家。」這就像細人仔搞份家啦仔共樣，象徵民族介興旺。一片識字識算，一片了解生活，達到了「教育斯係生活」介目的。係人生介縮影，表現出
淰淰介真情摎韻味。
數字有情，講出介話也有情。像該羅隱對該兜姊妹朋友講介：「一姊嬌來二姊嬌，三寸金蓮四寸腰；買便五六七盒粉，打扮八九十分嬌。」斯像看著佢兜在該打扮共樣。這也可以顛倒來講，像該「十九月色八分光，七姊下來配六郎；等到五更四三點，兩人賞月在一床。」人有情，使著數字有情，月光也有情，正經有無窮介韻味。
數字用得好，展現了真情，還能促成了美滿介婚姻，像該明朝賣菜介倫文敘，係廣東第一個狀元，佢替蘇東坡﹤百鳥歸巢圖﹥題詩，寫出：「天生一隻又一隻，三四五六七八隻；鳳凰何少鳥何多，啄盡人間千萬石」，儘多人看毋識，毋知一百係隱在該三四、五六、七八各乘起來，鬥等加上面前兩隻，堵堵好係一百隻，嗄批評佢寫著毋好。難得一個使女，溫柔聰明，正經係「遠樹兩旁山倒影，扁舟獨撐水橫流」介智「慧」，點出了一百介答案，兩人果然結成連理。實在已感動人心，韻味無窮。看來，數字毋係無情物，也會化做媒人來做媒。
數字毋係無情物，佢會成就婚姻，也會搶救婚姻。像該鳳求凰，有名司馬相如摎卓文君介戀愛故事，千古流傳。可惜，後來司馬相如變做「雙黃雞卵―－兩樣心」，聰明介文君，斯寫一首數字詩寄分佢，該就係：
一别之後，
兩地相思；
講等三四個月，
轉眼五六隻年；
七弦琴，無心彈；
八行書，無可傳；
九連環，從中斷；
十里長亭，望眼欲穿。
百般思，
千般念，
萬語千言百般念。
萬語千言百般怨，
十月風寒𠊎衣單，
九月登高望孤雁；
八月中秋月圓人無圓，
七月半，𠊎燒香秉燭問蒼天；
六月三伏天，人人撥扇𠊎心寒，
五月石榴紅過火，偏遇冷水淋花端；
四月枇杷吂黄𠊎心酸，
三月桃花謝了隨水轉，
二月風筝線仔斷，
唉呀呀，人生係講還有下一世，你為女來𠊎為男！
果然，數字毋係無情物，相如看了這封﹤怨郎詩﹥以後，非常感動，兩儕又恩恩愛愛，幸福過一生，能夠十全十美。
所以，在儘多盛大介結婚典禮，新郎新娘開始入席時節，司儀斯會唸十全十美介恭賀詞：
一對新人喜洋洋，兩人同心來拜堂；
三陽開泰慶吉祥，四季平安都健康；
五福臨門樂歡唱，六六大順孝爺娘；
七世夫妻情意長，八面玲瓏才華洋；
久久長長萬世昌，十全十美福滿堂。
這介祝福，體會著數字介陰陽和諧之道，夫妻，係人倫開始介道理，有情斯成家，希望天下有情人，能夠「一見兩面笑連連，三番四次去公園；五六七擺阿姆講，八九十世好姻緣。」雙雙對對，萬年富貴。祝福大家「十福百福全家福，千春萬春滿堂春。」正經係「數字毋係無情物 用到真情韻味深。」
※本文的「介」為大眾通用的「的」，同教育部訂的「个」之意。
