國立中央大學 客家學院 電子報
神明愛信，香愛擎；乞食愛做，笐愛背。意思係講：做人愛有基本原則，心中一定愛有敬畏大自然介思想，堅定介信念，正能達成自家介目標。愛達成這目標，斯愛有能夠摎天地神明溝通介法寶，該就係從古流傳到這下介「香」。愛擎香，燒香來表示自家虔誠介心願，斯像乞食出門愛背笐共樣，正分有東西好食。笐，係生存介法寶，也係責任摎負擔。仰般燒香敬神，嗄拿背笐來比？這就係職業無貴賤，毋好看輕人，大家都係共樣。不過，等重要介係：做麼介，愛像麼介，愛有道德正好。
仰般愛信神明？神，毋係迷信介神。神，係一種大自然奇妙介力量。所謂天神引出萬物，春生夏長，秋收冬藏；春秋變化，日夜循環；江流不盡，日用不匱。看該天生萬物來供人，人嗄無點仔東西可報天。原來，人，係恁渺小微細到像天地之間芮芮仔介麻仔共樣，愛仰般來回報？斯有感謝大自然，這大自然就安到天，安到神，能擎香信神，就係能夠感謝上天，飲水思源，知恩圖報。
聽講上早時代，大舜接受了堯讓佢介帝位。堯摎大舜，斯係三界爺介天官地官，佢兩儕摎禹，民間尊為三官大帝。堯在廟肚舉行一場盛大祭典，佢兜燒樹仔分佢出煙，無胚著，樹煙嗄散發出香味，沖上天庭，分天帝領受。接等又向江河大山，五湖四海介神明祭拜。過後介二月，又卜一隻吉日良時，東巡到泰山，一手擎起樹椏香草，一手點火摎佢燒著，又準備香酒米穀，在神明牌位面前祭拜，散發出介煙摎米穀祭品介香，沖向天頂，這可能就係最早介燒香。
擎香敬神，係經過苦境以後，深刻介反想。所以，燒香祭拜天地神明，係一種感恩，飲水思源介仁德表現。根據《詩經．大雅．生民》講：頭擺有一隻細妹仔，安到姜嫄。有一日，來到青山綠水之間，心情當快樂，希望子孫可以一直傳承下去。恁堵好，嗄踏著大人介腳跡，斯像分電掣著共樣，心肝頭搏唧一下，就有身項咧，無幾久，斯降出一隻細嬰兒，佢試著這毋係好頭彩，棄嫌這隻嬰兒，就摎佢掉在行人當少介細路上，牛馬經過，竟然全部自動閃佢。
又摎佢擲在草竇樹欉肚，好得山肚有人做事，看著毋盼得，斯摎佢攬到安全介位所。姜嫄看佢恁耐命，又摎佢丟在結冰介河壩頂高，無想著當多鳥仔，一群一群飛下來揞佢，分佢燒暖。姜嫄話著佢係神，遽遽摎佢攬轉來畜。因為當初弃(棄)嫌佢，所以摎佢安到弃，係周介始祖。
成人長大介弃，當好耕種，成為農師，就係有名介后稷。想著自家從細分人㧒忒恁多擺，還能夠食到恁大，冥冥之中，一定有神明暗中庇佑，愛常存感恩之心，斯排起香案，準備肉，準備酒來敬天，敬神。看該香味一陣一陣升起，天帝食著當暢。斯講：你兜敬介當香，也當係時節。所以，後來敬神一定愛有香。香，可以供養眾神，傳達誠信，一直流傳到今。
敬神明愛用香來傳達信息，共樣，做乞食也愛用背笐來做家濟，所謂「做乞食也愛一份家濟本」，該家濟本，就係乞食仔介笐摎袋，係講「乞食仔掉家濟」該就橫笐橫袋咧。所以，乞食仔儘少無背笐，一來表明身分，二來分著介東西乜有好張。斯像「上山毋帶刀，毋當屋下坐」共樣，上山帶刀可比乞食背笐，千萬毋好小看乞食，衫褲著昶靚兜仔，該可能還會分無呢，所謂「乞食華裳分無食，爛廟爛壁香油來」，做乞食也毋係恁簡單唷。
乞食背笐，也可能係無形介負擔，比論講，受著家庭變故介乞食仔，為了繳厥徠仔讀書，中狀元咧還毋敢分佢知，講阿爸係乞食，會分佢無面子。尤其係阿爸為了家庭去偷東西，還分徠仔判死刑，實在係當辛酸介事情，這隻笐，背著可能已辛苦呢！這就係乞米養狀元介故事，所以講，職業無貴賤，有兜乞食，實在無奈何啊！
乞食背笐，係一種考驗。像該乞食子兒賴東進，佢屋下14儕全係乞食，該係因為厥爸正4歲，就接等堵著人生介風霜。厥公、厥婆過身以後，目珠又看毋著。斯帶等月琴，怙等拐棍，拿等爛碗，滿天下去討食，雖然日仔像「落水天㧡禾稈樣，緊㧡緊重」，還係有耐心摎善良介惻隱之心，摎該衰過呆呆，又發豬嫲瘵介細妹仔，帶轉醫病，後來變成夫妻，這就係東進介爺哀。東進出世，正一歲就跈等去做乞食，連做17年，摎爺哀共下打拚，貧賤不能移，後來，當選十大傑出青年。
大文學家陶淵明，也識苦到去做乞食；臭頭皇帝朱洪武，細細時節，也因為飢荒做乞食去摎人分。還有一位一生人做乞食，就係為了辦教育介武訓，佢用30年，買著300夫田，辦義學分窮苦人讀書，可以講摎孔子共樣偉大。正經係乞食愛做笐愛背，這隻笐，就係人生崇高介理想。
看該三界爺摎后稷等，背等苦難無形介笐，還知好擎香感謝天地神明；陶淵明，朱洪武摎武訓，雖然做乞食，還係有人生高尚介理想。東進介乞食爺，苦到背笐，還去行醫。佢兜善良介心，散發出道德芬芳。雖無擎香，也係擎香，實在係靈心一現，萬里霞光；紫雲瑞氣，明德馨香。
※本文的「介」為大眾通用的「的」，同教育部訂的「个」之意。
