華客語對譯課堂心得
【圖、文／江卓安／中央大學客家研究博士生】
華語同客語，都係《國家語言發展法》裡背肚，規定个國語，毋過有兜人就會試著講，亻厓毋會看客家字，毋過亻厓會看漢字。抑係講有兜人想學客語，想愛摎自家浸到該客家个環境肚，就會想愛多看一息客家个字，還學習客家話。
就係因為恁多原因，分語言之間个「翻譯」緊來緊重要，故所前一學期同學都緊來修「華客語對譯」个課程，在該學期，秀琪先生先係教等亻厓兜人，麼个係對譯，正過來對譯个結果，愛仰般調整，正毋會分結果看起來係「國語客家」。還有大自家決定該學期愛選擇一隻主題進行翻譯，亻厓自家該組選擇个係李喬先生个經典文本：〈水鬼城隍〉，乜有別組个做了盡多精彩个呈現，像係摎作家侯文詠个《頑皮故事集》做翻譯，乜有組別係選了影視作品，佢兜翻譯了《名偵探柯南》个第一集，乜有組係選了星座故事集，十分多元。
到學期中，大自家就各組分事頭，分分啊咧，乜有堵著翻譯个問題，大自家乜到課堂肚項交流，像亻厓這組翻譯〈水鬼城隍〉，都翻譯到會癲忒，好比像：「這片山林就沉沒在虛無縹緲之中......」阿姆哀，該愛仰般翻譯，到課堂分享經驗个杰雄老師乜講這可能愛盡量有「取捨」，最尾大家決定用「濛煙」來帶過「虛無縹緲」，實在還生趣。到最尾个期末呈現，大自家都決定一種呈現方式。
《名偵探柯南》就用呈現影片个方式，星座故事集係RPG樣式个遊戲式影片呈現，再過《頑皮故事集》个同學係用錄好个聲音放出來分同學聽啊咧，最尾〈水鬼城隍〉係用「讀者劇場」个方式進行呈現，還生趣，因為單淨亻厓這組愛上台表演，大自家个「華客語翻譯處女作」就同大家分享。最尾大家都有一隻想愛做對譯工作个想望。該來課堂分享現場口譯个敏莉老師乜同亻厓都分享盡多，正知講：口譯毋單淨愛翻譯客語，還愛翻譯情緒，亻厓曉講客，毋過亻厓做口譯都毋記得翻譯着感情，這係愛有功夫个！
華客語對譯這條路係盡生趣个，透過秀琪先生開个「華客語文對譯」課程，分亻厓學習着盡多毋單淨係翻譯个理論，過較多个係翻譯个實務操作，還過實踐个過程。
分客語愛過較有影響力，對華客語對譯這條路來起步，可能係一條盡好个路，上忒課以後，亻厓毋係繼續講等客語定定，愛起步摎客家同華語做連結，這可能係一隻盡好个方法。
