苗栗打蘭－－詩人詹冰个故鄉
【文／黃子堯】
發音人：黃子堯（四縣腔）
打蘭係臺灣水果个王國
食果子長大个詩人詹冰
後生時走去日本讀醫藥
「峨崙廟」个三山國王有保佑
學著日本話
乜學會醫藥人生个化學變化
轉來打蘭當地開藥局
又分人請到中學來教理化
詹冰寫詩〈綠血球〉
五月。
通透个血管裡度，
綠色个血球在泅水。
五月係恁仰个生物呢。
五月無著衫褲步行
在山丘，用胎毛敨氣。
在原野，用光芒歌唱。
續等，五月愛毋睡毋尞个繼續向前行。
五月个腳步
係打蘭迎向春天个生活線路
詹冰用詩歌輕輕仔个音樂
開花又結果
人講「藥學詩人」一年又一年
愛寫出故鄉同外鄉个大變化
註: 「打蘭」係苗栗卓蘭个舊名，詩人詹冰係「跨越語言个一代」，講个係饒平腔客話，2004年過身，尊稱係「藥學詩人」。
