閒談南北兩畫家2
【文／鍾榮富／南臺科技大學應用英語系講座教授】
發音人：鍾榮富（南四縣腔）
右手一張係頭擺客家婦女拈禾串个圖樣，作風含意同米勒个名畫〈拾穗〉多少共樣，毋過在表達方面，張校長盡量顯出佢自家个風格。第一點，米勒个作品人物面向畫面个左手片，張校長个「拈禾串」个人物面向右手片，方向差別看出對光影个深淺不同。第二點，米勒个畫面淨面前三個婦女，「拈禾串」還有遠遠个農民在無閒打米粒，張校長還係講就遠近个連續感。米勒个遠方都係麥稈堆，可見時間遠比「拈禾串」个時間還較慢。就畫个技巧講，米勒个線條幼膩，善用烏影顯出婦女為了生活，為了桌頂个麥片，不得不在日頭下辛苦拈主家跌落个麥穗。「拈禾串」个笠嫲凸顯了客家婦女个耐勞特質，毋過較少情感个刻劃。規隻畫面重點在臨暗時節割禾過後个恬靜，這做得看出作者心目中對客家禾田、婦女、山風个解釋。
簡單來講，這兩張圖讓讀者領受著張校長个畫風，總係追求畫面个平衡布局，想愛透過平靜个畫面表達畫家心肚个情感，像大部分个客家文人共樣，這種情感係簡淡冷靜、帶兜壓抑，帶兜拘謹，十分客家个情懷。
這下轉過來看曾文忠先生个作品。曾先生退休過後，歸美濃作畫、參與社區營造、帶領後生人共下關心美濃个生態，分美濃人安到「永遠个先生」。雖然佢對客家个關顧係全面性个，毋過亻厓認為佢骨內還係藝術家个氣質，平常佢就想將美濃提升到美感个境界，故所佢个社區理想還係建立在美感个面向。佢在美濃播下个種籽，已經慢慢仔暴芽。今下个美濃，多少帶有濃濃个人文味緒，就係最好个反映。
曾先生盡受美濃人个敬仰，幾乎美濃所有个學校、公共場所、圖書館都會有厥大幅个作品，歸扇壁、歸面牆、歸个長廊，毋係畫月光山、美濃湖，就畫聖蹟亭、畫雙溪，到位都想將這都地方透過色彩、透過心肚个理想角度，留下佢本人對美濃个腳跡。每一張圖，明眼人一看就知該係麼个所在，毋過佢畫个所在都帶等佢當時个看法、心情，故所畫面毋會全共樣，總有息把差別，讀者愛用心觀賞，對線條、對光影、對明暗个對比，慢慢仔正會體會畫家个多情。
談畫家，總愛先看作品。這下先看曾文忠先生兩幅畫作:
頂項左手片題名為「田野暮色」，主要愛將美濃山下臨暗个色彩、景色、寬闊視野收入畫面裡肚。這幅作品屬於簡筆水彩畫，應該看做佢作畫之前个速寫，故所線條毋多講就，主要係透過色彩來表現晚霞初綻个時節，美濃山下个樣貌，有孤立个檳榔樹，有蒼茫个曠野，有多煙多雲个山景。(伸个下一期繼續)
