種草莓个老人家个道嘆
【文／彭欽清／國立政治大學退休教授】
發音人：彭欽清（四縣腔）
種草莓个老人家个道嘆
嗨──嗯！ 實──在還發冷哦──！
一 ──到選舉時──，你知無──？
逐──個候選人，
就膨──風膨到斯──毋會煞，
相──賽在該喋──大話。
隻──隻就講到斯──口涎──波潑，
毋係說自家有幾──慶仔，
就係罵別個候選人盡──㜮。
儕──儕就在該盡──膨講，
係選──著佢來做啊───，
這───佢會爭取幾多千萬， 該──佢又會爭取幾多億；
這條路佢定──著會開， 該座橋佢絕──對會做；
大──細事情總──概交分佢，
佢──就會做到圓滿──圓滿。
哼嗯！ 莫在該恁──騙人毋識哪──！
亻厓啊食哩七──十零吔，
選舉啊──， 選多哩──！
看著个政治人物啊──，
哪──隻毋係生來一張屎胐嘴──？
哪──個毋係講話像打──屁卵樣仔？
一 ──日到暗總係會膣──喥喥 尿──喳喳，
專──門開歸──大拖攞个空頭支票。
等分佢選──啊著，
兩──下半就阿他媽康──苦力，
選前講个話做──盡就毋記得到淨──淨。
人講个啊──，
政──治人物个話係信得啊──， 屎──就食得話──，
亻厓看斯嶄──蠻有影哦──！
毋係亻厓愛講哦───， 你這兜政治人物啊──，
正──經係恁──有才調个話啊，
就去同天公參詳看啊哩哪──，
喊佢草莓期啊──， 毋好緊──漚雨，
無斯草莓會綿到淨──淨，
本錢拈──就拈毋轉喔──！
另外愛喊佢呀， 寒天就愛像寒天──，
忒──燒暖个話啊──， 草莓會紅來忒遽，
害大家摘到斯──老──命強強就會畀收忒。
還有盡──重要个係， 選著个人啊──，
莫緊──去打麼个膏米麩球哪──！
也莫專──門去托有錢人个核卵──；
下──把仔啊 也愛到莊下來行啊哩──，
來看亻厓這兜耕種人， 當──緊工个時節，
半──夜兩點零， 寒到正四──五度仔，
就愛去到園項。
額頭項戴等探照燈，磬──等老腰骨，
仰仔用像枝仔冰个手指，
定──定仔摘下一粒一粒仔个草莓？
毋過， 話──又講倒轉來哦──，
係無你這兜人恁──好選舉啊──，
該──又會壞蹄喲！
仰仔講呢──？你怕毋知哦──？
等草莓一──紅呵！
歸──大群仔个鳥仔就會飛過來偷食，
毒──又毒毋著， 打──紙炮仔也嚇毋走，
搣──到大家斯──丟丟──滴滴。
好──得有這兜候選人一──哪插个宣傳旗仔，
有相又有名仔， 幾──好用仔你知無──？
收——收揫來， 插──插到田項去，
風吹──啊來，
一 ──隻隻个人頭就霹靂──噼啦掞掞動，
變到斯──比牛頭馬面還較得人驚，
鳥仔看──啊著，做──盡飛到尾瀉屎。
故所亻厓講啊，
草莓園實──在係臺灣政治人物盡──團結个所在。
係毋信个話啊──， 有閒來大湖看啊哩哪──，
李登輝 彭明敏 許信良 陳水扁 連戰 宋楚瑜 傅學鵬 何智輝
各──種大細選舉个候選人，
一──概都企在草莓園項，
成立一個當──有效率个聯合政府，
無分你係麼──个黨， 佢係麼──个派，
看──啊著有鳥仔飛過來，
逐──儕就盡命牯在該擛旗仔，
逐──儕就盡勢牯在該另聲胲，
大──家都當認分，
大──家都共條心，
煞──力牯相賽在該──逐鳥仔。
說明：
1. 過忒年初仔，又愛選舉了。兩三十年前，見草莓當出該下，對臺北轉大湖，車仔一到水尾坪，就看著草莓園歸路仔一哪就插等各種競選候選人个宣傳旗仔，亻厓就想愛寫兜東西來同佢記錄下來，就寫出這首長詩。2018年識在客家電子報刊出，有兜用詞試著無已合意，就略略仔改啊，再讀過加一到。
2. 客語詩个韻律感大體愛靠牽聲來表現，淨用文字寫出來，看个人當難了解。這首詩就用愛牽聲該字个背後加兩個破折號來代表牽聲，就係同愛加強語氣个字讀較重啊，還過拉長啊了。像「實──在」，來加強詩个韻律性。堵著疊字乜共樣，像「隻── 隻」、「丟丟──滴滴」。
