第二十三屆「客家研究」研究生學術論文研討會 盛大舉行
【圖／林奕寧／客社系三年級：文／鄭焄妤／客社系三年級】
發音人：鄭焄妤（四縣腔）
國立中央大學客家學院，為著培養臺灣新生代客家研究潛力，廣納後生學者對客家研究个各個面向，在十月二十一號舉辦第二十三屆「客家研究」研究生學術論文研討會。其中邀請了來自臺灣各地个學者摎研究生，共同討論客家文化同語言，還過客家政策个重要議題，這個活動乜係客家學院二十週年系列个活動之一，目標係推動客家研究領域个發展，同時慶祝客家學院个成立。
這屆研討會个主題有幾下種，包含國家語言摎客家政策、客家政治摎經濟、客家社會摎文化、客家語言摎文學，還過其他同客家文化相關个議題，結合學者同關心客家个人士，還過收集優秀客家研究生論文。透過這兜議題个討論，分與會者深入研究客家文化、政策同語言个重要性，展現新世紀客家思考摎樣貌，還過愛仰仔在這下多元文化个社會當中傳承摎推廣。
研討會一開始，客家語文暨社會科學學系吳學明榮譽教授，帶來一場分人印象當深个演講，演講主題係「戴華元益民劄付新探--兼談清代客家族群的再遷徙」，佢用一點鐘个時間，深入簡出，紹介清代客家族群个歷史、遷徙還有文化，分研討會帶來一個精彩个開頭。
這擺个研討會，毋單止分後生个客家研究生，提供了一个展示佢兜研究成果个平台，還餳了國内个專家學者，當多研究生展現了佢兜對客家議題个深刻觀察，同時也分享了研究發現，各領域个學者也用佢兜个專業知識進行評論，分發表者適當个建議，還過文章做得修改个方向。
「臺上三分鐘，臺下十年功」，逐個發表者都把扼淨十分鐘个發表時間，在有限个時間內摎自家个研究成果，做一擺呈現分現場个與談人還過參與者，佢兜煞猛分享，臺下个聽眾乜當認真聽，在每一個場次个最尾還提出問題摎大家共下討論、互相交流。
客家語文暨社會科學學系系主任黃菊芳，盡尾還特別感謝在場个工作人員，還有來𢯭手个同學，佢乜有提著，客家研究研究生學術論文研討會既經持續舉辦了二十三屆，實在係一件無簡單个事情，希望後生做得還較湛斗，帶分客家光明个未來。
