該首歌
【文／劉書瑀／苗栗頭份國中教師】
發音人：劉書瑀（四縣腔）
毋像大家有閒就放歌曲、唱歌仔，佢一溜里來就好恬靜，盡好係尋隻僻靜个位所，自家一儕恬恬仔坐等，麼个事就毋使做。
學生仔總係吵死人，可能長透坐在教室肚悶等，尋着機會就唊無停，一日到暗在該打嘴鼓，正經係棺材脣唸經——吵死人。日時頭既經耐毋何，下班轉夜屋下細孲仔又跳上跌落、舂上舂下，日日愛人陪等搞，害佢歸日頭那噼噼滾，時不時就愛吞粒藥仔，哪還忍得較多个聲音，想起作家春上村樹講个：這世間忒吵鬧，係做得有一支遙控器摎聲音撙較細兜仔，毋知有幾好。
想起擐大肚个時，人講做阿姆个愛多聽古典樂，對嬰兒仔較好，做得培養心性，佢心肚想：拜託，亻厓根本聽毋得一息聲，係仰般會較增！
想起有一擺，還吂結婚該時，摎現下个老公冤家，毋記得係麼个細事了，兩儕吵到毋想講話，擎等電話又毋肯掛，毋知過仔幾久，話筒傳來音樂聲，係細倈人在該片放歌仔，希望佢聽著，莫過譴了，可惜佢還忒後生，只顧得愐心事，浪費對方个心意，聽等聽等就睡過去了。
還有一日，摎學生仔約好食飽夜，愛共下轉去學校過上課，車頂項學生仔講：「先生，做得聽廣播無？」平常乖乖無麼个要求个學生仔罕得開口，高不將就聽一下欸，恁堵好，廣播裡肚傳出一首異流行个情歌。車仔停好，上課時辰吂到，學生仔還想摎歌曲聽煞，熄火个車仔項兩儕恬恬仔坐等，翕熱个臨暗頭，無一息風，奇怪个係佢煩躁个心顛倒平靜下來，就伸歌聲輕輕仔流過。講起來，安靜毋安靜，其實全在人个腹內，毋係外背。
還讀書个時節，下課就去阿姆工廠𢯭手，紙擘廠裡肚機器吵鬧聲無停，長透跈等rajio个la la聲，係工人在該聽客家電臺，聽久後佢還會跈唱兩句「大戇牯汽車」、「月光華華」、「天公落水」……
算來係麼个因由開始放棄聽歌仔？上班壓力？家庭因素？
今暗晡，佢決定愛在轉屋後，摎頭擺買个CD尋出來，分自家一首歌个時間，放一首歌曲，好好坐下來食杯茶、聽下歌仔，好好愛自家、做自家，安然自在。
