楊梅泉水窩江夏堂建築个藝術風華（五）
【圖、文／徐貴榮／國立中央大學客家語文暨社會科學學系兼任助理教授】
發音人：徐貴榮（四縣腔）
石刻藝術，也就係石雕，係請有名个朱師傅來做个。石刻藝術主要表現在門額、門楣、門聯、腰垛、裙垛、櫃臺腳、竹節窗這兜位所。門聯「江迴錦浪波千頃」、「夏繞薰風扇一枝」同竹節窗頂高个窗額「橫經」、「負耒」採用「陰刻」。門額「江夏堂」，門楣「雙龍戲珠」、「天官雕像」、「窗櫺」，過還有其他全採用「陽刻」。恁樣有浮有凹，在人个視覺上有強烈个感覺、藝術个表現。這兜門額、門對、窗額个文字用紅底襯托，看起來金金金，非常个打眼，毋係用漆个，係用金箔去貼个，恁樣正會長久。係講用漆个，當遽會㪐忒，無就走色，該就無麼个價值。（圖38）
圖38 門額、門楣、門對、吐水、屋棟剪黏（2016.11.08攝影）
大門前腰垛兩片个石刻，有梅花、山阿鵲。「山阿鵲」華語安到「喜鵲」，意涵就係「喜上眉梢」。底下裙垛兩片都有「鳳凰」，「麒麟」、「牡丹花」，同屋棟共樣就係「三王圖」。（圖39、40）
圖39 大門龍片腰垛石刻「喜上眉梢」、裙垛「三王圖」。（2023.08.21攝影）
圖40 大門虎片腰垛石刻「喜上眉梢」、裙垛「三王圖」。（2023.08.21攝影）
裙垛脣項「龍片凹壁」刻一條老虎背等一隻盎仔，盎仔頂高插等菊花；「虎片凹壁」換過一隻鹿仔，共樣背等一隻盎仔，盎仔頂高插等菊花。華話「虎」同「福」諧音，「鹿」同「祿」共音，「菊」同「舉」諧音，「盎仔」講「瓶子」，「瓶」同「平」共音。兩片个石刻意象，合起來个意涵就係「一舉（菊）成名」，「福（虎）祿（鹿）平（瓶）安」。（圖41、42）
圖41 裙垛脣龍片凹壁个石刻：老虎向門背等盎仔插菊花（2023.08.21攝影）
圖42 裙垛脣虎片凹壁个石刻：鹿仔向門背等盎仔插菊花（2023.08.21攝影）
「櫃臺腳」像恩俚个腳，刻个係龍生九子。聽講這龍係「螭龍」，螭龍當豺，全部東西分佢食淨淨，伸一支腳，安到「櫃臺腳」。一般人起屋，柱壁平平下來个有較多，係加櫃臺腳愛加當多工。這間江夏堂盡功夫，毋單止做櫃臺腳，還全部有刻，逐垤都有鏨喔！ （圖43）
圖43 櫃臺腳石刻「螭龍」（2023.08.21攝影）
毋單止恁仔，甚至連落峨間个底下，又乜有刻。因為年代久吔！龍片刻个風化忒嚴重，看毋清楚哩！伸着虎片較清楚。刻个係四隻「蝠婆仔」，圍等一隻香爐。華語「蝠婆仔」安到「蝙蝠」，意象係「四蝠圍爐」。華語「四蝠」同「賜福」共音，「爐仔」在頭擺做得「煉丹求壽」。「圍爐」又代表「一家團圓」。故所，意涵就係「賜福添壽」、「闔家團圓」，也就係「福壽圓滿」。（圖44）
圖44 虎片「落峨間」个石刻「四蝠圍爐」，意思係「福壽圓滿」。（2023.08.21攝影）
「竹節窗」希望子孫像竹仔樣仔，中空有節，做人愛謙虛有節，意涵「節節高昇」、「高風亮節」。一般人家个竹節窗，就做到像竹仔一節一節仔定定，毋會加刻兜東西。係講愛加刻，該愛當多工，愛成本。這堂屋除忒兩片个窗額「橫經」、「負耒」陰刻以外，窗櫺這兜全用浮刻。刻「客家纏花」，有金銀花、玉蘭花這兜，還有銅錢，表示「金玉滿堂」。（圖45、46）
圖45 龍片竹節窗个石刻（2020.10.28攝影）
圖46 虎片竹節窗个石刻（2020.10.28攝影）
這間江夏堂經過幾下擺个大地動，都無麼个問題，藝術風華保存到今百過年吔！可見當年祖公起屋時，風水个考量，建築設計个高明，期望後代子孫个發展，都想到十分个周到，不得不分人感着非常个欽服。黃屋土地恁闊，毋過經過分家，臺灣光復過後，耕者有其田政策放領，又分政府徵收做軍事用地，到這下逐家伸着个田地無幾多咧！好得子孫恁有量度，願意提供出來分政府做古蹟，使得這一座恁靚个客家建築，藝術風華永久保存下去。（圖47）
圖47 楊梅江夏堂全貌（圖片提供：黃耀昌先生）
（全文完！本文个完成，愛感謝主人黃耀祿校長，黃耀昌先生、彭雙燕小姐賢伉儷个導覽、解說，並提供民國69年元月出版个「桃園縣楊梅鎮 鎮平黃氏其輝公派下族譜」做參考。）
